ಅಮೆರಿಕದ ಸೇಬು, ಬಾದಾಮಿ ಮತ್ತು ಅಕ್ರೋಟ್ (ವಾಲ್‌ನಟ್) ನಂತಹ ಉತ್ಪನ್ನಗಳ ಮೇಲಿನ ಆಮದು ಸುಂಕವನ್ನು ಗಣನೀಯವಾಗಿ ಕಡಿತಗೊಳಿಸಿರುವ ಅಥವಾ ‘ಶೂನ್ಯ ಸುಂಕ’ಸ ನೀತಿಯನ್ನು ಅಳವಡಿಸಿಕೊಂಡಿರುವ ಪರಿಣಾಮವಾಗಿ, ಮುಂದಿನ ದಿನಗಳಲ್ಲಿ ಅಮೆರಿಕದ ಉತ್ಪನ್ನಗಳು ಭಾರತದ ಮಾರುಕಟ್ಟೆಯಲ್ಲಿ ಸುರಿದು ಬೀಳಲಿವೆ ಎಂಬ ಆತಂಕ ಸೃಷ್ಟಿಯಾಗಿದೆ.
ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದವು ಕೇವಲ ವಾಣಿಜ್ಯ ಲೆಕ್ಕಾಚಾರಗಳಿಗೆ ಮಾತ್ರ ಸೀಮಿತವಾಗದೆ, ಮಣ್ಣಿನ ಮಕ್ಕಳ ಅಸ್ತಿತ್ವದ ಪ್ರಶ್ನೆಯಾಗಿ ಮಾರ್ಪಟ್ಟಿದೆ. ರೈತರ ಆತಂಕವನ್ನು ಸರ್ಕಾರ ಗಂಭೀರವಾಗಿ ಪರಿಗಣಿಸದಿದ್ದರೆ, ‘ಭಾರತದ ಸ್ವರ್ಗ’ ಎಂದೇ ಕರೆಯಲ್ಪಡುವ ಕಣಿವೆ ರಾಜ್ಯಗಳ ಕೃಷಿ ಆರ್ಥಿಕತೆ ಇತಿಹಾಸದ ಪುಟ ಸೇರುವ ಅಪಾಯವಂತೂ ನಿಚ್ಚಳವಾಗಿದೆ
ಭಾರತ ಮತ್ತು ಅಮೆರಿಕ ನಡುವಿನ ನೂತನ ವ್ಯಾಪಾರ ಒಪ್ಪಂದಗಳು ಇದೀಗ ದೇಶದ ಅತಿ ದೊಡ್ಡ ಸೇಬು ಮತ್ತು ಒಣಹಣ್ಣು(ಡ್ರೈಫ್ರೂಟ್) ಬೆಳೆಗಾರರ ಪಾಲಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿವೆ. ವಿಶೇಷವಾಗಿ ಕಾಶ್ಮೀರ ಮತ್ತು ಹಿಮಾಚಲ ಪ್ರದೇಶದ ರೈತರು ಈ ಬೆಳವಣಿಗೆಯಿಂದ ತೀವ್ರ ಕಂಗಾಲಾಗಿದ್ದು, ತಮ್ಮ ತಲೆಮಾರುಗಳ ಕೃಷಿ ವ್ಯವಹಾರ ಸಂಪೂರ್ಣವಾಗಿ ಸರ್ವನಾಶವಾಗುವ ಭೀತಿಯಲ್ಲಿದ್ದಾರೆ.
ಅಮೆರಿಕದ ಸೇಬು, ಬಾದಾಮಿ ಮತ್ತು ಅಕ್ರೋಟ್ (ವಾಲ್‌ನಟ್) ನಂತಹ ಉತ್ಪನ್ನಗಳ ಮೇಲಿನ ಆಮದು ಸುಂಕವನ್ನು ಗಣನೀಯವಾಗಿ ಕಡಿತಗೊಳಿಸಿರುವ ಅಥವಾ ‘ಶೂನ್ಯ ಸುಂಕ’ಸ ನೀತಿಯನ್ನು ಅಳವಡಿಸಿಕೊಂಡಿರುವ ಪರಿಣಾಮವಾಗಿ, ಮುಂದಿನ ದಿನಗಳಲ್ಲಿ ಅಮೆರಿಕದ ಉತ್ಪನ್ನಗಳು ಭಾರತದ ಮಾರುಕಟ್ಟೆಯಲ್ಲಿ ಸುರಿದು ಬೀಳಲಿವೆ ಎಂಬ ಆತಂಕ ಸೃಷ್ಟಿಯಾಗಿದೆ. ಇದು ಸ್ಥಳೀಯ ಮಾರುಕಟ್ಟೆಯ ಬೆಲೆಗಳ ಮೇಲೆ ತೀವ್ರವಾದ ನಕಾರಾತ್ಮಕ ಪರಿಣಾಮ ಬೀರಲಿದ್ದು, ದೇಶೀಯ ಕೃಷಿಕರ ಬದುಕನ್ನು ಸಂಕಷ್ಟಕ್ಕೆ ನೂಕಿದೆ.
ಈ ಹಿಂದೆ, ದೇಶೀಯ ರೈತರನ್ನು ರಕ್ಷಿಸುವ ಉದ್ದೇಶದಿಂದ ವಿದೇಶಿ ಹಣ್ಣುಗಳು ಮತ್ತು ಒಣಹಣ್ಣುಗಳ ಮೇಲೆ ನಿರ್ದಿಷ್ಟ ಆಮದು ಸುಂಕವನ್ನು ವಿಧಿಸಲಾಗುತ್ತಿತ್ತು. ಆದರೆ, ಇತ್ತೀಚಿನ ದ್ವಿಪಕ್ಷೀಯ ವ್ಯಾಪಾರ ಒಪ್ಪಂದಗಳ ಅನ್ವಯ ಅಮೆರಿಕದ ವಾಷಿಂಗ್ಟನ್ ಸೇಬು ಮತ್ತು ಕ್ಯಾಲಿಫೋರ್ನಿಯಾದ ಬಾದಾಮಿ ಹಾಗೂ ಅಕ್ರೋಟ್‌ಗಳಿಗೆ ಭಾರತದ ಮಾರುಕಟ್ಟೆಯ ಹೆಬ್ಬಾಗಿಲು ಮುಕ್ತವಾಗಿ ತೆರೆದುಕೊಂಡಿದೆ.
ಅಮೆರಿಕದಲ್ಲಿ ಅತ್ಯಾಧುನಿಕ ತಂತ್ರಜ್ಞಾನ, ಬೃಹತ್ ಪ್ರಮಾಣದ ಕೃಷಿ ಭೂಮಿ ಮತ್ತು ಸರ್ಕಾರದ ಭಾರಿ ಸಬ್ಸಿಡಿಗಳ ನೆರವಿನೊಂದಿಗೆ ಬೆಳೆಯಲಾಗುವ ಈ ಉತ್ಪನ್ನಗಳು, ಆಮದು ಸುಂಕದ ಅಡೆತಡೆ ಇಲ್ಲದಿದ್ದಾಗ ಅತ್ಯಂತ ಕಡಿಮೆ ಬೆಲೆಗೆ ಭಾರತದ ಮಾರುಕಟ್ಟೆಯನ್ನು ಪ್ರವೇಶಿಸುತ್ತವೆ. ಆಕರ್ಷಕ ಪ್ಯಾಕೇಜಿಂಗ್ ಮತ್ತು ಬಣ್ಣದಿಂದ ಕೂಡಿರುವ ಈ ಹಣ್ಣುಗಳ ಎದುರು, ಸಾಂಪ್ರದಾಯಿಕ ವಿಧಾನದಲ್ಲಿ ಕೃಷಿ ಮಾಡುವ ನಮ್ಮ ಸ್ಥಳೀಯ ರೈತರು ಪೈಪೋಟಿ ನಡೆಸುವುದು ಅಸಾಧ್ಯದ ಮಾತಾಗಿದೆ. ಇದು ಭಾರತದ ಮಾರುಕಟ್ಟೆಯಲ್ಲಿ ಸ್ಥಳೀಯ ಸೇಬು ಮತ್ತು ಡ್ರೈಫ್ರೂಟ್‌ಗಳ ಬೇಡಿಕೆಯನ್ನು ತೀವ್ರವಾಗಿ ಕುಸಿಯುವಂತೆ ಮಾಡಲಿದೆ.
ಕಾಶ್ಮೀರದ ಕಣಿವೆಯಲ್ಲಿ ಕಂಗಾಲಾದ ರೈತ
ಶೋಪಿಯಾನ್ ಭಾಗದ ಸೇಬು ಬೆಳೆಗಾರರು ಪ್ರಸ್ತುತ ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ವರ್ಷಪೂರ್ತಿ ಹಗಲಿರುಳು ಶ್ರಮಿಸಿ ಬೆಳೆ ತೆಗೆಯುವ ರೈತರಿಗೆ, ರಸಗೊಬ್ಬರ, ಕೀಟನಾಶಕ, ಕಾರ್ಮಿಕರ ಕೂಲಿ ಹಾಗೂ ಸಾಗಾಟ ವೆಚ್ಚಗಳ ತೀವ್ರ ಏರಿಕೆಯು ಬಾರೀ ಹೊರೆಯಾಗಿ ಪರಿಣಮಿಸಿದೆ. ಈ ದುಬಾರಿ ವೆಚ್ಚಗಳ ನಡುವೆ, ಅಮೆರಿಕದ ಹಣ್ಣುಗಳು ಶೂನ್ಯ ಸುಂಕದಡಿ ಮಾರುಕಟ್ಟೆಗೆ ಲಗ್ಗೆಯಿಟ್ಟರೆ, ಕೃಷಿಗೆ ಹೂಡಿದ ಕನಿಷ್ಠ ಉತ್ಪಾದನಾ ವೆಚ್ಚವನ್ನು ಮರಳಿ ಪಡೆಯುವುದು ಕೂಡ ಅಸಾಧ್ಯವಾಗಲಿದೆ.
ಕಳೆದ ಕೆಲವು ವರ್ಷಗಳಲ್ಲಿ ಮಾರುಕಟ್ಟೆಯಲ್ಲಿ ಸೇಬಿಗೆ ಉತ್ತಮ ಬೆಲೆ ದೊರೆತಾಗಲೂ, ಮಿತಿಮೀರುತ್ತಿರುವ ಹಣದುಬ್ಬರ ಹಾಗೂ ಜೀವನ ವೆಚ್ಚಗಳಿಂದಾಗಿ ರೈತರಿಗೆ ದಿನನಿತ್ಯದ ಕನಿಷ್ಠ ಅಗತ್ಯಗಳನ್ನು ಪೂರೈಸಿಕೊಳ್ಳುವುದೇ ದೊಡ್ಡ ಸವಾಲಾಗಿತ್ತು. ಇದೀಗ ಹೊಸ ವ್ಯಾಪಾರ ಒಪ್ಪಂದದ ಪರಿಣಾಮವಾಗಿ ಮಾರುಕಟ್ಟೆಯಲ್ಲಿ ಸ್ಥಳೀಯ ಹಣ್ಣುಗಳ ಬೆಲೆ ಸಂಪೂರ್ಣವಾಗಿ ಪಾತಾಳಕ್ಕೆ ಕುಸಿದರೆ, ತಮ್ಮ ಬದುಕು ದುಸ್ತರವಾಗಲಿದ್ದು, ಇಡೀ ಕುಟುಂಬಗಳೇ ಬೀದಿಪಾಲಾಗುವ ಭೀತಿಯನ್ನು ರೈತ ಸಮುದಾಯ ವ್ಯಕ್ತಪಡಿಸುತ್ತಿದೆ.
ಸೇಬಿನ ತೋಟಗಳನ್ನೇ ಕಡಿಯುವ ಆತಂಕದ ಸನ್ನಿವೇಶ
ಪರಿಸ್ಥಿತಿ ಇದೇ ರೀತಿ ಮುಂದುವರಿದರೆ, ಭವಿಷ್ಯದಲ್ಲಿ ತೀವ್ರ ಹತಾಶೆಗೆ ಒಳಗಾಗುವ ರೈತರು ತಮ್ಮ ತಲೆಮಾರುಗಳಿಂದ ಬೆಳೆಸಿಕೊಂಡು ಬಂದಿರುವ ಸೇಬಿನ ತೋಟಗಳನ್ನೇ ಕಡಿದು ಹಾಕುವಂತಹ ದುರಂತ ಸನ್ನಿವೇಶ ನಿರ್ಮಾಣವಾಗುವ ಭೀತಿ ಎದುರಾಗಿದೆ. ಒಂದು ಸೇಬಿನ ಮರ ನೆಟ್ಟು, ಅದು ಫಸಲು ನೀಡುವ ಹಂತಕ್ಕೆ ಬರಲು ವರ್ಷಗಳ ಶ್ರಮ ಮತ್ತು ಆರೈಕೆ ಬೇಕಾಗುತ್ತದೆ. ಆದರೆ, ಕೃಷಿ ಲಾಭದಾಯಕವಾಗಿ ಉಳಿಯದಿದ್ದಾಗ, ಸಾಲದ ಶೂಲಕ್ಕೆ ಸಿಲುಕುವ ರೈತರು ಬೇರೆ ದಾರಿಯಿಲ್ಲದೆ ಪರ್ಯಾಯ ಬೆಳೆಗಳತ್ತ ಮುಖ ಮಾಡಲು ತೋಟಗಳನ್ನೇ ನಾಶಪಡಿಸುವಂತಹ ನಿರ್ಧಾರಕ್ಕೆ ಬರಬಹುದು ಎಂದು ಕೃಷಿ ತಜ್ಞರು ಎಚ್ಚರಿಸಿದ್ದಾರೆ. ಒಮ್ಮೆ ಸೇಬು ಮತ್ತು ವಾಲ್‌ನಟ್ ತೋಟಗಳು ನಾಶವಾದರೆ, ಕೇವಲ ಆರ್ಥಿಕತೆಯಷ್ಟೇ ಅಲ್ಲ, ಕಾಶ್ಮೀರ ಮತ್ತು ಹಿಮಾಚಲದ ಭೌಗೋಳಿಕ ಮತ್ತು ಪರಿಸರ ವ್ಯವಸ್ಥೆಯ ಮೇಲೂ ಅದು ಗಂಭೀರ ಪರಿಣಾಮ ಬೀರಲಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ವಿದೇಶಗಳಲ್ಲಿ ದ್ವೇಷಕ್ಕೆ ಭಾರತೀಯರ ಬಲಿ- ಕೈಕಟ್ಟಿ ಕುಳಿತಿರುವರೇ ‘ವಿಶ್ವಗುರು’?
ಹಿಮಾಚಲದ ಸೇಬು ಬೆಳೆಗಾರರಿಗೂ ಸಂಕಟ
ಈ ವ್ಯಾಪಾರ ಒಪ್ಪಂದದ ಬಿಸಿ ಕೇವಲ ಕಾಶ್ಮೀರಕ್ಕೆ ಮಾತ್ರ ಸೀಮಿತವಾಗಿಲ್ಲ. ಭಾರತದ ಮತ್ತೊಂದು ಪ್ರಮುಖ ಸೇಬು ಉತ್ಪಾದಕ ರಾಜ್ಯವಾದ ಹಿಮಾಚಲ ಪ್ರದೇಶದ ಬೆಳೆಗಾರರನ್ನೂ ಇದು ತೀವ್ರ ಸಂಕಟಕ್ಕೆ ಈಡುಮಾಡಿದೆ. ಶಿಮ್ಲಾ, ಕುಲ್ಲು, ಮಂಡಿ ಮತ್ತು ಕಿನ್ನೌರ್ ಜಿಲ್ಲೆಗಳ ಬಹುತೇಕ ಜನರ ಆದಾಯದ ಮೂಲ ಸೇಬು ಕೃಷಿಯೇ ಆಗಿದೆ. ಹಿಮಾಚಲ ಪ್ರದೇಶದ ಭೌಗೋಳಿಕ ಸ್ಥಿತಿಗತಿಗಳಿಂದಾಗಿ ಇಲ್ಲಿ ಸಾಗಾಟ ವೆಚ್ಚ ಕಾಶ್ಮೀರಕ್ಕಿಂತಲೂ ಅಧಿಕ.
ಈ ಹಿನ್ನೆಲೆಯಲ್ಲಿ, ಅಗ್ಗದ ವಿದೇಶಿ ಸೇಬುಗಳ ಪ್ರವೇಶ ಹಿಮಾಚಲದ ಕೃಷಿಕರನ್ನು ಆರ್ಥಿಕವಾಗಿ ಮತ್ತಷ್ಟು ದುರ್ಬಲಗೊಳಿಸಲಿದೆ. ಸ್ಥಳೀಯ ಮಾರುಕಟ್ಟೆಗಳಲ್ಲಿ ಈಗಾಗಲೇ ಅಮೆರಿಕನ್, ಇರಾನಿಯನ್ ಮತ್ತು ಟರ್ಕಿಶ್ ಸೇಬುಗಳ ಹಾವಳಿ ಹೆಚ್ಚಾಗಿದ್ದು, ಸ್ಥಳೀಯ ‘ರಾಯಲ್ ಡಿಲಿಶಿಯಸ್’ ಮತ್ತು ‘ಕಿನ್ನೌರ್ ಸೇಬು’ಗಳಿಗೆ ಬೇಡಿಕೆ ಕಡಿಮೆಯಾಗುತ್ತಿದೆ. ಶೂನ್ಯ ಸುಂಕದ ನೀತಿಯು ಈ ಬಿಕ್ಕಟ್ಟನ್ನು ಇನ್ನಷ್ಟು ಉಲ್ಬಣಗೊಳಿಸಲಿದ್ದು, ಹಿಮಾಚಲದ ಗ್ರಾಮೀಣ ಆರ್ಥಿಕತೆಯನ್ನು ಬುಡಮೇಲು ಮಾಡುವ ಅಪಾಯವಿದೆ.
ಸರ್ಕಾರದ ಮಧ್ಯಪ್ರವೇಶದ ತುರ್ತು ಅಗತ್ಯ
ಮುಕ್ತ ಮಾರುಕಟ್ಟೆ ಮತ್ತು ಜಾಗತೀಕರಣದ ಯುಗದಲ್ಲಿ ಅಂತಾರಾಷ್ಟ್ರೀಯ ವ್ಯಾಪಾರ ಒಪ್ಪಂದಗಳು ಅನಿವಾರ್ಯವಾಗಿರಬಹುದು. ಆದರೆ, ಅದು ದೇಶದ ಅನ್ನದಾತನ ಬದುಕನ್ನು ಬಲಿಪಡೆದು ಆಗಬಾರದು ಎಂಬುದು ಕೃಷಿ ಹೋರಾಟಗಾರರ ಆಗ್ರಹವಾಗಿದೆ. ರೈತರ ಹಿತಾಸಕ್ತಿಯನ್ನು ಕಾಪಾಡಲು ಕೇಂದ್ರ ಸರ್ಕಾರವು ತಕ್ಷಣವೇ ಎಚ್ಚೆತ್ತುಕೊಳ್ಳಬೇಕಿದೆ. ವಿದೇಶಿ ಹಣ್ಣುಗಳ ಆಮದಿನ ಮೇಲೆ ನಿರ್ದಿಷ್ಟ ಮಿತಿ ಹೇರುವುದು, ದೇಶೀಯ ಸೇಬು ಮತ್ತು ಡ್ರೈಫ್ರೂಟ್‌ಗಳಿಗೆ ಸೂಕ್ತ ಬೆಂಬಲ ಬೆಲೆ ನಿಗದಿಪಡಿಸುವುದು, ಕೋಲ್ಡ್ ಸ್ಟೋರೇಜ್ (ಶೀತಲೀಕರಣ ಘಟಕ) ಸೌಲಭ್ಯಗಳನ್ನು ಹೆಚ್ಚಿಸುವುದು ಮತ್ತು ರಫ್ತು ಉತ್ತೇಜನಕ್ಕೆ ಸಬ್ಸಿಡಿ ಒದಗಿಸುವಂತಹ ದಿಟ್ಟ ಹೆಜ್ಜೆಗಳನ್ನು ಇಡಬೇಕಿದೆ.
ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದವು ಕೇವಲ ವಾಣಿಜ್ಯ ಲೆಕ್ಕಾಚಾರಗಳಿಗೆ ಮಾತ್ರ ಸೀಮಿತವಾಗದೆ, ಮಣ್ಣಿನ ಮಕ್ಕಳ ಅಸ್ತಿತ್ವದ ಪ್ರಶ್ನೆಯಾಗಿ ಮಾರ್ಪಟ್ಟಿದೆ. ರೈತರ ಆತಂಕವನ್ನು ಸರ್ಕಾರ ಗಂಭೀರವಾಗಿ ಪರಿಗಣಿಸದಿದ್ದರೆ, ‘ಭಾರತದ ಸ್ವರ್ಗ’ ಎಂದೇ ಕರೆಯಲ್ಪಡುವ ಕಣಿವೆ ರಾಜ್ಯಗಳ ಕೃಷಿ ಆರ್ಥಿಕತೆ ಇತಿಹಾಸದ ಪುಟ ಸೇರುವ ಅಪಾಯವಂತೂ ನಿಚ್ಚಳವಾಗಿದೆ.
