ತಮ್ಮ ಬದುಕನ್ನೇ ಪಣಕ್ಕಿಟ್ಟು ಸಮಾಜದ ಕ್ರೂರ ಆಚರಣೆಯ ವಿರುದ್ಧ ಹೋರಾಡಿದ ಸುನಿತಾ ಅರಳೀಕರ್ ಅವರು, ಇಂದು ಭಾರತದಲ್ಲಿ 'ಹೆಣ್ಣು ಮಗುವನ್ನು ಉಳಿಸಿ' ಚಳವಳಿಯ ಪ್ರಮುಖ ಧ್ವನಿಯಾಗಿ ಗುರುತಿಸಿಕೊಂಡಿದ್ದಾರೆ. ಮಣ್ಣಿನಲ್ಲಿ ಹೂತುಹಾಕಲ್ಪಟ್ಟ ಮಗುವೊಂದು ಇಂದು ಸಾವಿರಾರು ಹೆಣ್ಣುಮಕ್ಕಳ ಜೀವ ರಕ್ಷಿಸಲು ಹೋರಾಡುತ್ತಿರುವುದು ಅತ್ಯಂತ ರೋಚಕ ಮತ್ತು ಸ್ಪೂರ್ತಿದಾಯಕ ಪಯಣ.ಕೆಲವು ಘಟನೆಗಳು ಕೇಳುವಾಗ ಅದು ಕಟ್ಟುಕತೆ ಅನಿಸಬಹುದು. ಆದರೆ ಅವು ನೈಜ ಬದುಕಿನ ಅತ್ಯಂತ ಕಹಿ ಸತ್ಯ ಎಂದು ತಿಳಿದಾಗ ನಮಗೆ ಅಚ್ಚರಿಯಾಗುವುದಂತು ನಿಜ. ಅಂತಹುದ್ದೇ ಒಂದು ಅಪರೂಪದ, ಕಣ್ಣೀರು ತರಿಸುವ ಸಾಹಸಗಾಥೆ ಸುನಿತಾ ಅರಳೀಕರ್ ಅವರದ್ದು. ಅರಳೀಕರ್ ಹುಟ್ಟಿದ 14 ದಿನಗಳಲ್ಲೇ ಸ್ವಂತ ತಂದೆಗೆ ಬೇಡವೆನಿಸಿದವರು. ತಂದೆಯೇ ಹಸುಗೂಸನ್ನು ಮಣ್ಣಲ್ಲಿ ಹೂತುಹಾಕಿದ್ದರು! ಮಣ್ಣಿನಡಿಯಿಂದ ಹೊರ ಬಂದ ಈ ಜೀವ ಈಗ ಹೆಣ್ಣುಮಕ್ಕಳ ರಕ್ಷಣೆಗಾಗಿ ಧ್ವನಿಯಾಗಿದೆ.
ಹೌದು, ತಂದೆ ಮಣ್ಣಿನಡಿ ಹೂತ ಬಳಿಕ ಸುನಿತಾ ಅವರ ಅಜ್ಜ ಮಗುವನ್ನು ಮಣ್ಣಿನಿಂದ ಹೊರತೆಗೆದಿದ್ದರು. ಅಜ್ಜನಿಂದ ಜೀವದಾನ ಪಡೆದ ಈ ಮಹಿಳೆ ಇಂದು ಸಮಾಜದಲ್ಲಿ ಹೆಣ್ಣುಶಿಶು ಹತ್ಯೆ ಮತ್ತು ಹೆಣ್ಣು ಭ್ರೂಣ ಹತ್ಯೆಯ ವಿರುದ್ಧವಾಗಿ ನಿಂತಿದ್ದಾರೆ. ಮಹಿಳೆಯರ ಪರವಾಗಿ ಬೃಹತ್ ಮಟ್ಟದ ಜಾಗೃತಿ ಮೂಡಿಸುತ್ತಿರುವ ಧೀರ ಧ್ವನಿಯಾಗಿದ್ದಾರೆ.
ಇದನ್ನೂ ಓದಿ: ಮಹಿಳಾ ದಿನಾಚರಣೆ ವಿಶೇಷ: ಕಳೆದೆರಡು ದಶಕಗಳಲ್ಲಿ ಕ್ರೀಡಾಂಗಣವನ್ನಾಳಿದ 10 ಭಾರತೀಯ ಮಹಿಳೆಯರು
ಹಸುಗೂಸನ್ನು ಹೂತಿದ್ದ ತಂದೆ
ಮಹಾರಾಷ್ಟ್ರದ ಬೀಡ್ ಜಿಲ್ಲೆಯ ಕೃಷಿ ಕುಟುಂಬವೊಂದರಲ್ಲಿ ಸುನಿತಾ ಅರಳೀಕರ್ ಅವರ ಜನನವಾಯಿತು. ಈಗಾಗಲೇ ಹೆಣ್ಣುಮಕ್ಕಳಿದ್ದ ಆ ಕುಟುಂಬದಲ್ಲಿ ಮತ್ತೆ ಹೆಣ್ಣು ಮಗು ಹುಟ್ಟಿದ್ದು ತಂದೆಗೆ ಕಿಂಚಿತ್ತೂ ಇಷ್ಟವಿರಲಿಲ್ಲ. ಮಗು ಹುಟ್ಟಿದ 14ನೇ ದಿನಕ್ಕೆ, ತಾಯಿ ಮನೆಯಲ್ಲೇ ಪ್ರಜ್ಞಾಹೀನಳಾಗಿ ಬಿದ್ದಿದ್ದ ಸಮಯದಲ್ಲಿ, ತಂದೆ ಈ ಹಸುಗೂಸನ್ನು ಹತ್ತಿರದ ಜಮೀನಿನಲ್ಲಿ ಜೀವಂತವಾಗಿ ಹೂತುಹಾಕಿದ್ದನು.
ಮಗುವಿನ ತಾಯಿ ಪ್ರಜ್ಞೆಗೆ ಬಂದಾಗ ಮಗು ಕಾಣದಿದ್ದಾಗ ಚೀರಲಾರಂಭಿಸಿದಳು. ವಿಷಯ ತಿಳಿದ ಅಜ್ಜ (ತಾಯಿಯ ತಂದೆ) ತಕ್ಷಣವೇ ಜಮೀನಿನತ್ತ ಓಡಿ ಮಣ್ಣನ್ನು ಅಗೆದು ಮಗುವನ್ನು ಹೊರತೆಗೆದರು. ಅದೃಷ್ಟವಶಾತ್, ಮಗುವಿನ ಶ್ವಾಸಕೋಶಕ್ಕೆ ಇನ್ನು ಮಣ್ಣು ತಲುಪಿರಲಿಲ್ಲ ಮತ್ತು ಮಗುವಿಗೆ ಜೀವವಿತ್ತು! ತಕ್ಷಣವೇ ಮಗುವನ್ನು ಸುರಕ್ಷಿತವಾಗಿ ರಕ್ಷಿಸಿದ ಅಜ್ಜ, ಆ ಮಗುವನ್ನು ತಾನೇ ಸಾಕಿ ಬೆಳೆಸುವ ನಿರ್ಧಾರ ಮಾಡಿದರು. ಆ ಮಗುವೇ ಇಂದಿನ ಸುನಿತಾ ಅರಳೀಕರ್.
ಅಜ್ಜನ ಪ್ರೀತಿ, ಆರೈಕೆ ಮತ್ತು ಶಿಕ್ಷಣದ ಹಾದಿ: ಒಂದು ಸಾಹಸಮಯ ಬದುಕು
ಸಾಪೇಕ್ಷವಾಗಿ ಬಡತನದಲ್ಲಿದ್ದ, ದಲಿತ ಸಮುದಾಯದ ಹಾಗೂ ಚರ್ಮದ ಕೆಲಸ (ಮೋಚಿ) ಮಾಡುತ್ತಿದ್ದ ಸುನಿತಾ ಅವರ ತಾಯಿಯ ತಂದೆ (ಅಜ್ಜ) ‘ಕುಂಡಲಿಕರಾವ್ ಮಾನೆ’ ಅವರಿಗೆ ಆ ಘಟನೆಯ ನಂತರದ ಹಾದಿ ಸುಲಭದ್ದಾಗಿರಲಿಲ್ಲ. ಮಗುವನ್ನು ಜಮೀನಿನಲ್ಲಿ ಹೂತ ಮಣ್ಣಿನಡಿಯಿಂದ ಜೀವಂತವಾಗಿ ಹೊರತೆಗೆದ ಮೇಲೆಯೂ, ಆ ಹಸುಗೂಸನ್ನು ಉಳಿಸಿಕೊಳ್ಳುವುದು ದೊಡ್ಡ ಸವಾಲಾಗಿತ್ತು.
ಮಗುವನ್ನು ಸಮಾಧಿಯಿಂದ ಹೊರತೆಗೆದು ಮನೆಗೆ ತಂದಾಗ, ಮಗುವಿನ ತಾಯಿ (ಸುನಿತಾ ಅವರ ಅಮ್ಮ) ಮೃತಪಟ್ಟಿದ್ದರು. ಆಸ್ಪತ್ರೆ ಮತ್ತು ನರ್ಸಿಂಗ್ ವ್ಯವಸ್ಥೆ ಇಲ್ಲದ ಆ ಬಡ ವಾತಾವರಣದಲ್ಲಿ ಹಸುಗೂಸಿಗೆ ತಾಯಿಯ ಹಾಲಿನ ಅಭಾವ ಎದುರಾಯಿತು. ಅಜ್ಜ ಮಗುವನ್ನು ಬೆಚ್ಚಗಿಡಲು ಹರಿದ ಸೀರೆಯಲ್ಲಿ ಸುತ್ತಿ ಕೊಟ್ಟಿಗೆಯಲ್ಲಿದ್ದ ಆಡುಗಳ ಮಧ್ಯೆ ಮಲಗಿಸುತ್ತಿದ್ದರು. ಹತ್ತಿಯ ಬತ್ತಿಯಿಂದ ಆಡಿನ ಹಾಲನ್ನು ಮಗುವಿನ ಬಾಯಿಗೆ ಇಳಿಸಿ ಜೀವ ಉಳಿಸಿದ್ದರು.
ಆ ಸಮಯದಲ್ಲಿ ಸುನಿತಾ ಅವರ ಅಜ್ಜಿ (ಚಂದ್ರಭಾಗಾ) ಕೂಡ ಹೆಣ್ಣುಮಗುವೊಂದಕ್ಕೆ ಜನ್ಮ ನೀಡಿದ್ದರು. ಅಜ್ಜ ಅಜ್ಜಿಗೆ ಸಮಾಧಾನ ಹೇಳಿ ತಮ್ಮ ಮಗಳ ಮಗುವಿಗೂ (ಸುನಿತಾ) ಎದೆ ಹಾಲನ್ನು ಕುಡಿಸುವಂತೆ ಮಾಡಿ, ಇಬ್ಬರೂ ಹೆಣ್ಣುಮಕ್ಕಳು ಜತೆಯಾಗಿ ಬೆಳೆಯುವಂತೆ ನೋಡಿಕೊಂಡರು.
ಅಸ್ಪೃಶ್ಯತೆ ಮತ್ತು ಬಡತನದ ಸವಾಲುಗಳು
ಮಹಾರಾಷ್ಟ್ರದ ಲಾತೂರ್ ಜಿಲ್ಲೆಯ ಗ್ರಾಮೀಣ ಪ್ರದೇಶದಲ್ಲಿ ದಲಿತ ಕುಟುಂಬದಲ್ಲಿ ಬೆಳೆದ ಸುನಿತಾ ಬಾಲ್ಯ ಕಠಿಣವಾಗಿತ್ತು. ಅಜ್ಜ ಚರ್ಮದ ಕೆಲಸ ಹಾಗೂ ಕೂಲಿ ಕೆಲಸ ಮಾಡುತ್ತಿದ್ದರಿಂದ ತೀವ್ರ ಬಡತನವಿತ್ತು. ಕುಟುಂಬವು ಕೆಲವು ಕಾಲ ದನದ ಕೊಟ್ಟಿಗೆಯಲ್ಲೂ ವಾಸಿಸಬೇಕಾದ ಪರಿಸ್ಥಿತಿ ಎದುರಾಗಿತ್ತು. ದಲಿತ ಸಮುದಾಯಕ್ಕೆ ಸೇರಿದ್ದರಿಂದ ಅಸ್ಪೃಶ್ಯತೆಯ ತಾರತಮ್ಯವನ್ನು ಎದುರಿಸಬೇಕಾಯಿತು. ನೀರು ತರುವುದು, ಸಮಾಜದಲ್ಲಿ ವ್ಯವಹರಿಸುವುದರಲ್ಲೂ ಕಷ್ಟವಿತ್ತು. ಆದರೂ ಅಜ್ಜ ಸುನಿತಾ ಅವರನ್ನು ‘ಶಿವಕಾಂತಾ ಕುಂಡಲಿಕರಾವ್ ಮಾನೆ’ ಎಂದು ತಮ್ಮ ಹೆಸರಿನಲ್ಲೇ ಗುರುತಿಸಿ, ಹೆತ್ತ ತಂದೆಯ ಹೆಸರು ಎಲ್ಲೂ ಬಾರದಂತೆ ಪ್ರೀತಿಯಿಂದ ಮಗಳಂತೆ ಬೆಳೆಸಿದರು.
ಇದನ್ನೂ ಓದಿ: ಮಹಿಳಾ ದಿನದ ವಿಶೇಷ | ಗ್ರಾಮೀಣ ಆರ್ಥಿಕತೆ: ಹೈನುಗಾರಿಕೆಯಲ್ಲಿ ಮಹಿಳಾ ಸಬಲೀಕರಣದ ಕಥೆ
ಅಜ್ಜ ಸುನಿತಾ ಅವರಿಗೆ ಮೂಲಭೂತ ಶಿಕ್ಷಣ ಕೊಡಿಸಿದರು. ಆದರೆ ಪ್ರೌಢಶಾಲಾ ಶಿಕ್ಷಣಕ್ಕಾಗಿ ಆಕೆಯ ಹುಟ್ಟೂರಾದ ಕೋಟಲ್ ಶೀವಾನಿಗೆ ಹೋಗಬೇಕಾಯಿತು. ಇದು ಸುನಿತಾ ಅವರನ್ನು ಕೊಲ್ಲಲು ಯತ್ನಿಸಿದ್ದ ಸ್ವಂತ ತಂದೆಯೇ ವಾಸಿಸುತ್ತಿದ್ದ ಊರಾಗಿತ್ತು! ಶಿಕ್ಷಣ ಪೂರ್ಣಗೊಳಿಸಲು ಬೇರೆ ದಾರಿಯಿಲ್ಲದೆ ತಂದೆಯ ಮನೆಯಲ್ಲೇ ಇದ್ದು ಶಾಲೆಗೆ ಹೋಗಬೇಕಾಯಿತು. ಅಲ್ಲಿ ತಮ್ಮನ್ನು ಕೆಲಸದಾಳುವಿನಂತೆ ನಡೆಸಿಕೊಳ್ಳಲಾಯಿತು ಎಂಬುದನ್ನು ಹಲವಾರು ಸಂದರ್ಶನದಲ್ಲಿ ಸುನಿತಾ ಅವರು ಹೇಳಿಕೊಂಡಿದ್ದಾರೆ.
ಸುನಿತಾ ಅವರೇ ಹೇಳುವಂತೆ ತಾವು ಶಿಕ್ಷಣ ಪಡೆಯುವುದನ್ನು ಇಷ್ಟಪಡದ ತಂದೆ ಮತ್ತು ಸಾಕುತಾಯಿ (ಚಿಕ್ಕಮ್ಮ) ಸುನಿತಾ ಅವರ ಪುಸ್ತಕಗಳನ್ನು ಸುಡಲು ಯತ್ನಿಸಿದ್ದರು. ಇಷ್ಟು ಮಾತ್ರವಲ್ಲದೆ ಎರಡನೇ ಬಾರಿಗೆ ಸುನಿತಾರ ಕೊಲೆ ಯತ್ನವೂ ನಡೆದಿತ್ತು. ಸುನಿತಾ ಅವರಿಗೆ ಸುಮಾರು 14 ವರ್ಷವಾಗಿದ್ದಾಗ, ಮನೆಯಲ್ಲಿ ಅನುಮಾನಾಸ್ಪದ ತಿಂಡಿ (ಭಾಕರಿ) ನೀಡಲಾಯಿತು. ಅದರಲ್ಲಿ ವಿಷವಿರಬಹುದು ಎಂದು ಶಂಕಿಸಿದ ಸುನಿತಾ ತಕ್ಷಣ ಅಜ್ಜನ ಬಳಿಗೆ ಓಡಿಹೋಗಿದ್ದರು. ಆ ಸಂದರ್ಭದಲ್ಲಿಯೂ ಅಜ್ಜ ಸುನಿತಾರಿಗೆ ಧೈರ್ಯ ತುಂಬಿ, ‘ಯಾವುದೇ ಕಾರಣಕ್ಕೂ ಶಿಕ್ಷಣವನ್ನು ನಿಲ್ಲಿಸಬೇಡ’ ಎಂದು ಪ್ರೋತ್ಸಾಹಿಸಿದ್ದರು.
ಅಜ್ಜನ ಪ್ರೋತ್ಸಾಹ ಹಾಗೂ ತಮ್ಮ ಛಲದಿಂದಾಗಿ ಸುನಿತಾ ಅವರು ಹೈಸ್ಕೂಲ್ ಶಿಕ್ಷಣವನ್ನು ಪೂರ್ಣಗೊಳಿಸಿ, ನಂತರ ಲಾತೂರ್‌ನಲ್ಲಿ ವೈದ್ಯಕೀಯ ಕ್ಷೇತ್ರದ ‘ಟ್ರೈನಿ ನರ್ಸ್’ (Trainee Nurse) ಆಗಿ ತರಬೇತಿ ಪಡೆದು ಕೆಲಸಕ್ಕೆ ಸೇರಿಕೊಂಡರು. ಅಲ್ಲಿ ದೊರೆತ ಆರ್ಥಿಕ ಸ್ವಾವಲಂಬನೆ ಅವರ ಹೊಸ ಬದುಕನ್ನು ಕಟ್ಟಿಕೊಳ್ಳಲು ಮತ್ತು ಮುಂದಿನ ಸಾಮಾಜಿಕ ಹೋರಾಟಕ್ಕೆ ಬಲವಾದ ಅಡಿಪಾಯವನ್ನು ಹಾಕಿಕೊಟ್ಟಿತು.
ಸಮಾಧಿಯಿಂದ ಹೊರಬಂದ ಜೀವಕ್ಕೆ ಅಜ್ಜ ಕುಂಡಲಿಕರಾವ್ ಅವರು ಕೇವಲ ಜೀವದಾನ ನೀಡಲಿಲ್ಲ; ತೀವ್ರ ಬಡತನ, ಅಸ್ಪೃಶ್ಯತೆ ಮತ್ತು ತಂದೆಯ ಕುಟುಂಬದ ಬೆದರಿಕೆಗಳ ನಡುವೆಯೂ ಆಕೆಯನ್ನು ಸಾಕಿ, ಶಾಲೆಗೆ ಕಳುಹಿಸಿ, ಸಮಾಜಕ್ಕೆ ದೊಡ್ಡ ಧ್ವನಿಯಾಗಿ ಬೆಳೆಯುವಂತೆ ಶಕ್ತಿ ತುಂಬಿದರು.
ಸಮಾಜದ ವಿರುದ್ಧ ಧ್ವನಿ ಎತ್ತಿದ ಸುನಿತಾ
ಬೆಳೆದು ದೊಡ್ಡವರಾದ ನಂತರ ತಮ್ಮ ಬದುಕಿನ ಕಹಿ ಘಟನೆಯನ್ನು ನೆನೆದು ಕುಗ್ಗದೆ, ಅದನ್ನೇ ತಮ್ಮ ಜೀವನದ ಗುರಿಯನ್ನಾಗಿ ಮಾಡಿಕೊಂಡವರು ಸುನಿತಾ. ವಿಶೇಷವಾಗಿ ಮಹಾರಾಷ್ಟ್ರದ ಬೀಡ್ ಜಿಲ್ಲೆ ಮತ್ತು ಸುತ್ತಮುತ್ತಲಿನ ಗ್ರಾಮೀಣ ಪ್ರದೇಶಗಳಲ್ಲಿ ಹೆಣ್ಣು ಭ್ರೂಣ ಹತ್ಯೆ ಮತ್ತು ಹೆಣ್ಣು ಶಿಶು ಹತ್ಯೆ ಪ್ರಕರಣಗಳು ಹೆಚ್ಚಾಗಿದ್ದವು. ಇದನ್ನು ತಡೆಯಲು ಸುನಿತಾ ಅವರು ಕ್ಷೇತ್ರಮಟ್ಟದಲ್ಲಿ ಕೆಲಸ ಮಾಡಲು ಪ್ರಾರಂಭಿಸಿದರು.
ಹಳ್ಳಿ ಹಳ್ಳಿಗಳಿಗೆ ತೆರಳಿ ಹೆಣ್ಣುಮಕ್ಕಳ ಪ್ರಾಮುಖ್ಯತೆ, ಕಾನೂನು ಅರಿವು ಮತ್ತು ಭ್ರೂಣ ಹತ್ಯೆಯ ಅಪರಾಧಗಳ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಿದರು. ಹೆಣ್ಣು ಮಗು ಹುಟ್ಟಿದಾಗ ಮನೆಯವರಿಂದ ಒತ್ತಡ ಎದುರಿಸುವ ತಾಯಂದಿರಿಗೆ ನೆರವು ನೀಡಿ, ಅವರಿಗೆ ಮಾನಸಿಕ ಧೈರ್ಯ ತುಂಬುವ ಕೆಲಸ ಮಾಡಿದರು. ಅಕ್ರಮವಾಗಿ ಗರ್ಭಪೂರ್ವ ಲಿಂಗ ಪತ್ತೆ (PCPNDT Act) ಮಾಡುವ ಆಸ್ಪತ್ರೆಗಳು ಮತ್ತು ಕೇಂದ್ರಗಳ ವಿರುದ್ಧ ಧ್ವನಿಯೆತ್ತಿ, ಅಧಿಕಾರಿಗಳ ಗಮನಕ್ಕೆ ತಂದು ಕ್ರಮ ಕೈಗೊಳ್ಳುವಂತೆ ಮಾಡಿದರು.
ತಮ್ಮ ಬದುಕನ್ನೇ ಪಣಕ್ಕಿಟ್ಟು ಸಮಾಜದ ಕ್ರೂರ ಆಚರಣೆಯ ವಿರುದ್ಧ ಹೋರಾಡಿದ ಸುನಿತಾ ಅರಳೀಕರ್ ಅವರು, ಇಂದು ಭಾರತದಲ್ಲಿ ‘ಹೆಣ್ಣು ಮಗುವನ್ನು ಉಳಿಸಿ’ (Save the Girl Child) ಚಳವಳಿಯ ಪ್ರಮುಖ ಧ್ವನಿಯಾಗಿ ಗುರುತಿಸಿಕೊಂಡಿದ್ದಾರೆ. ಮಣ್ಣಿನಲ್ಲಿ ಹೂತುಹಾಕಲ್ಪಟ್ಟ ಮಗುವೊಂದು ಇಂದು ಸಾವಿರಾರು ಹೆಣ್ಣುಮಕ್ಕಳ ಜೀವ ರಕ್ಷಿಸಲು ಹೋರಾಡುತ್ತಿರುವುದು ಅತ್ಯಂತ ರೋಚಕ ಮತ್ತು ಸ್ಪೂರ್ತಿದಾಯಕ ಪಯಣ.
ಪತ್ರಕರ್ತೆ, 2019ರಿಂದ ಪತ್ರಿಕೋದ್ಯಮವೇ ಬದುಕು. ರಾಜಕೀಯ, ಬ್ಯುಜಿನೆಸ್‌ ಸುದ್ದಿಗಳಲ್ಲಿ ಆಸಕ್ತಿ.
