ವಾರಕ್ಕೊಂದು ಅನುವಾದಿತ ಕವಿತೆ ಮಾಲಿಕೆಯಲ್ಲಿ ಇಂದು ಗುಲ್ಫಿಶಾ ಫಾತಿಮಾ ಅವರ ಇಂಗ್ಲಿಷ್‌ ಮೂಲದ ʼನನ್ನ ಸುತ್ತಲಿರುವ ಈ ಗೋಡೆಗಳುʼ ಕವಿತೆಯನ್ನು ಕನ್ನಡಕ್ಕೆ ಅನುವಾದಿಸಿದ್ದಾರೆ ಹಿರಿಯ ಅನುವಾದಕಿ ಸಿ ಎಚ್‌ ಭಾಗ್ಯ.
- Advertisement -
ನನ್ನ ಸುತ್ತಲಿರುವ ಈ ನಾಲ್ಕು ಗೋಡೆಗಳು
ಬಹಳ ದಿನಗಳಿಂದ ಮೌನವಾಗಿ ನಿಂತಿವೆ
ತಮ್ಮ ತಲೆಯ ಮೇಲೆ ಬಿರುಗಾಳಿ,ಚಂಡಮಾರುತ,
ಚುಚ್ಚುವ ಬಿಸಿಲನ್ನು ಹೊತ್ತು.
ನನಗೆ ಅಚ್ಚರಿ
ಇವು ಮಾತನಾಡವು ಏಕೆ?
ಇಲ್ಲ,ಇವು ಮಾತನಾಡುತ್ತವೆ
ಬಿಸಿಲು ಗಾಳಿಗೆ
ಗಾರೆ,ಮಣ್ಣು ಉದುರಿದಾಗ
ಖಂಡಿತ ಅವು ಏನೋ ಹೇಳುತ್ತವೆ.
ಆದರೆ ಯಜಮಾನ ಗೋಡೆಗಳನ್ನು ರಿಪೇರಿ ಮಾಡುತ್ತಾನೆ
ಗಾರೆಮೆತ್ತಿ ಅವುಗಳ ಬಾಯಿಗೆ.
ಕೊನೆಗೊಂದು ದಿನ
ಈ ಭಾರದ ಗೋಡೆಗಳು ಕುಸಿಯುತ್ತವೆ
ಅವುಗಳ ಜಾಗದಲ್ಲಿ ಹೊಸ ಸ್ತಬ್ಧಗೊಳಿಸಿದ ಗೋಡೆಗಳು ಎದ್ದು ನಿಲ್ಲುತ್ತವೆ.
