ಇರಾನ್ ವಿರುದ್ಧದ ಮಿಲಿಟರಿ ಕಾರ್ಯಾಚರಣೆ ಆರಂಭವಾದ ಮೊದಲ ಆರು ದಿನಗಳಲ್ಲಿಯೇ ಅಮೆರಿಕ 11.3 ಬಿಲಿಯನ್ ಡಾಲರ್‌ಗಿಂತಲೂ ಹೆಚ್ಚು ಖರ್ಚು ಮಾಡಿದೆ ಎಂದು ಪೆಂಟಗನ್ ಪ್ರತಿನಿಧಿಗಳು ಅಮೆರಿಕ ಕಾಂಗ್ರೆಸ್‌ಗೆ (ಸಂಸತ್ತು) ಮಾಹಿತಿ ನೀಡಿದ್ದಾರೆ ಎಂದು ‘ದಿ ನ್ಯೂಯಾರ್ಕ್ ಟೈಮ್ಸ್’ ವರದಿ ಮಾಡಿದೆ.
ಆದಾಗ್ಯೂ, ಈ ಅಂಕಿಅಂಶವು ಕಾರ್ಯಾಚರಣೆಗೆ ಸಂಬಂಧಿಸಿದ ಹಲವಾರು ವೆಚ್ಚಗಳನ್ನು ಒಳಗೊಂಡಿಲ್ಲ; ವಿಶೇಷವಾಗಿ ಆರಂಭಿಕ ದಾಳಿಗಳ ಮುನ್ನಾದಿನದಂದು ಮಿಲಿಟರಿ ಉಪಕರಣಗಳು ಮತ್ತು ಸಿಬ್ಬಂದಿಗಳ ನಿಯೋಜನೆಗೆ ತಗುಲಿದ ವೆಚ್ಚಗಳು ಇದರಲ್ಲಿ ಸೇರಿಲ್ಲ. ಪರಿಣಾಮವಾಗಿ, ಮೊದಲ ವಾರದಲ್ಲಿ ಉಂಟಾದ ವೆಚ್ಚಗಳ ಮೌಲ್ಯಮಾಪನವನ್ನು ಪೆಂಟಗನ್ ಪೂರ್ಣಗೊಳಿಸಿದ ನಂತರ ಒಟ್ಟು ಮೊತ್ತವು ಗಣನೀಯವಾಗಿ ಏರಿಕೆಯಾಗಲಿದೆ ಎಂದು ಅಮೆರಿಕ ಕಾಂಗ್ರೆಸ್‌ ಭಾವಿಸಿದೆ.
“ನಾವು ಮುಚ್ಚಿದ ಬಾಗಿಲಿನ ಚರ್ಚೆಗಳು ಅಥವಾ ವಿಷಯಗಳ ಬಗ್ಗೆ ಪ್ರತಿಕ್ರಿಯಿಸುವುದಿಲ್ಲ. ‘ಆಪರೇಷನ್ ಎಪಿಕ್ ಫ್ಯೂರಿ’ಯ (Operation Epic Fury) ವೆಚ್ಚಕ್ಕೆ ಸಂಬಂಧಿಸಿದಂತೆ ಹೇಳುವುದಾದರೆ, ಮಿಷನ್ ಪೂರ್ಣಗೊಳ್ಳುವವರೆಗೆ ನಮಗೆ ನಿಖರವಾದ ವೆಚ್ಚ ತಿಳಿಯುವುದಿಲ್ಲ” ಎಂದು ಪೆಂಟಗನ್ ವಕ್ತಾರರು ಹೇಳಿರುವುದಾಗಿ ‘ಎನ್‌ಬಿಸಿ ನ್ಯೂಸ್’ ವರದಿ ಮಾಡಿದೆ.
ಯುದ್ಧಕ್ಕಾಗಿ ಅಮೆರಿಕ ವ್ಯಯಿಸಿರುವ ಒಟ್ಟು ಮೊತ್ತದ ಕುರಿತಾದ ಅಸ್ಪಷ್ಟತೆಗಳ ಹೊರತಾಗಿಯೂ, ಸಂಘರ್ಷದ ಉದ್ದೇಶಗಳು, ವ್ಯಾಪ್ತಿ ಹಾಗೂ ಕಾಲಮಿತಿಯ ಬಗ್ಗೆ ಅಮೆರಿಕ ಕಾಂಗ್ರೆಸ್‌ ಸದಸ್ಯರು ಸ್ಪಷ್ಟನೆಗಾಗಿ ಒತ್ತಾಯಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: UCC ಜಾರಿಗೆ ಸಕಾಲ ಎಂದ ಸುಪ್ರೀಂ; ಬಾಣಲೆಯಿಂದ ಬೆಂಕಿಗೆ ಮುಸ್ಲಿಂ ಮಹಿಳೆಯರ ಹಕ್ಕುಗಳು?
ಯುದ್ಧದ ಮೊದಲ ಎರಡು ದಿನಗಳಲ್ಲಿ 5.6 ಬಿಲಿಯನ್ ಡಾಲರ್ ಮೌಲ್ಯದ ಯುದ್ಧಸಾಮಗ್ರಿಗಳನ್ನು ಬಳಸಲಾಗಿದೆ ಎಂದು ರಕ್ಷಣಾ ಇಲಾಖೆಯ ಅಧಿಕಾರಿಗಳು ಬ್ರೀಫಿಂಗ್‌ಗಳಲ್ಲಿ ತಿಳಿಸಿದ್ದಾರೆ ಎಂದು ‘ದಿ ವಾಷಿಂಗ್ಟನ್ ಪೋಸ್ಟ್’ ಈ ಹಿಂದೆ ವರದಿ ಮಾಡಿತ್ತು.
‘ಸೆಂಟರ್ ಫಾರ್ ಸ್ಟ್ರಾಟೆಜಿಕ್ ಅಂಡ್ ಇಂಟರ್ನ್ಯಾಷನಲ್ ಸ್ಟಡೀಸ್’ನ ಹಿಂದಿನ ಅಂದಾಜಿನ ಪ್ರಕಾರ, ಕಾರ್ಯಾಚರಣೆಯ ಮೊದಲ 100 ಗಂಟೆಗಳಲ್ಲಿ ವೆಚ್ಚವು ಸುಮಾರು 3.7 ಬಿಲಿಯನ್ ಡಾಲರ್ ಆಗಿತ್ತು. ಅಂದರೆ ಪ್ರತಿದಿನಕ್ಕೆ ಸರಿಸುಮಾರು 891.4 ಮಿಲಿಯನ್ ಡಾಲರ್ ವೆಚ್ಚವಾಗಿದೆ.
ಈ ಸಂಘರ್ಷ ಎಷ್ಟು ಕಾಲ ಮುಂದುವರಿಯಬಹುದು ಎಂಬುದು ಅನಿಶ್ಚಿತವಾಗಿಯೇ ಉಳಿದಿದೆ. ಮಂಗಳವಾರ ಈ ಬಗ್ಗೆ ಮಿಶ್ರ ಸೂಚನೆಗಳನ್ನು ನೀಡಿದ ಟ್ರಂಪ್, ಯುದ್ಧವು ಬಹಳ ಬೇಗ ಕೊನೆಗೊಳ್ಳಬಹುದು ಎಂದು ಹೇಳಿದರು. ಅದೇ ಸಮಯದಲ್ಲಿ, ಇದನ್ನು ‘ಕೇವಲ ಆರಂಭ’ ಎಂದು ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಬಣ್ಣಿಸಿದ್ದಾರೆ. ಯುದ್ಧ ಮುಂದುವರಿಕೆಯ ಸೂಚನೆ ನೀಡಿದ್ದಾರೆ. ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಫೆಬ್ರವರಿ 28ರಂದು ಇರಾನ್ ಮೇಲೆ ಸಂಘಟಿತ ದಾಳಿಗಳನ್ನು ಪ್ರಾರಂಭಿಸಿದವು. ದಾಳಿಗಳು ಪ್ರಾರಂಭವಾದಾಗಿನಿಂದ, ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್‌ನ ಹಲವಾರು ಹಿರಿಯ ರಾಜಕೀಯ ಮತ್ತು ಮಿಲಿಟರಿ ನಾಯಕರನ್ನು ಕೊಂದಿವೆ ಮತ್ತು ಬಾಂಬ್ ದಾಳಿಯನ್ನು ನಡೆಸಿವೆ. ಇದರಲ್ಲಿ 1,200 ಕ್ಕೂ ಹೆಚ್ಚು ಇರಾನಿಯನ್ನರು ಸಾವನ್ನಪ್ಪಿದ್ದಾರೆ. ಇದಕ್ಕೆ ಪ್ರತಿಯಾಗಿ ಇರಾನ್ ಕೊಲ್ಲಿ ರಾಷ್ಟ್ರಗಳಲ್ಲಿ ಅಮೆರಿಕದ ನೆಲೆಗಳು ಮತ್ತು ಮಿತ್ರರಾಷ್ಟ್ರಗಳ ಗುರಿಗಳ ಮೇಲೆ ಪ್ರತೀಕಾರದ ದಾಳಿಗಳನ್ನು ನಡೆಸಿದೆ. ಈ ದಾಳಿಗಳಲ್ಲಿ ಅಮೆರಿಕದ ಏಳು ಸೈನಿಕರು ಸಾವನ್ನಪ್ಪಿದ್ದಾರೆ ಮತ್ತು ಕನಿಷ್ಠ 140 ಇತರರು ಗಾಯಗೊಂಡಿದ್ದಾರೆ.
