ದೇಶದಲ್ಲಿ ಸೈಬರ್ ಅಪರಾಧ, ಹಣಕಾಸು ವಂಚನೆ ಹಾಗೂ ಅಕ್ರಮ ಕಂಟೆಂಟ್‌ಗಳಿಗೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಮಾರ್ಚ್‌ನಿಂದ ಜುಲೈವರೆಗಿನ ಅವಧಿಯಲ್ಲಿ ಸಾಮಾಜಿಕ ಮಾಧ್ಯಮಗಳಿಂದ ಸುಮಾರು 2.98 ಲಕ್ಷ ಯುಆರ್‌ಎಲ್‌ಗಳನ್ನು (ವೆಬ್‌ಲಿಂಕ್‌ಗಳು) ತೆಗೆದುಹಾಕುವಂತೆ (Takedown) ವಿವಿಧ ಸರ್ಕಾರಿ ಇಲಾಖೆಗಳು ಸೂಚಿಸಿವೆ ಎಂದು ಪ್ರೆಸ್ ಇನ್ಫರ್ಮೇಷನ್ ಬ್ಯೂರೋದ (ಪಿಐಬಿ) ಫ್ಯಾಕ್ಟ್ ಚೆಕ್ ಘಟಕ ಮಾಹಿತಿ ನೀಡಿದೆ.
ತೆಗೆದುಹಾಕಲು ನಿರ್ದೇಶಿಸಲಾದ ಒಟ್ಟು ಲಿಂಕ್‌ಗಳ ಪೈಕಿ ಶೇ 82 ರಷ್ಟನ್ನು (2.44 ಲಕ್ಷ ಯುಆರ್‌ಎಲ್‌ಗಳು) ವಿವಿಧ ರಾಜ್ಯ ಸರ್ಕಾರಗಳೇ ಗುರುತಿಸಿವೆ. ಉಳಿದ 51,000 ಲಿಂಕ್‌ಗಳನ್ನು ಕೇಂದ್ರ ಗೃಹ ಸಚಿವಾಲಯದ ವ್ಯಾಪ್ತಿಯಲ್ಲಿ ಬರುವ ‘ಭಾರತೀಯ ಸೈಬರ್ ಅಪರಾಧ ಸಮನ್ವಯ ಕೇಂದ್ರ’ (ಐ4ಸಿ – I4C) ಕಳುಹಿಸಿದೆ. ಮುಖ್ಯವಾಗಿ ಸೈಬರ್ ವಂಚನೆ, ನಕಲಿ ಮೂಲಸೌಕರ್ಯ ಯೋಜನೆಗಳು ಮತ್ತು ಷೇರು ಮಾರುಕಟ್ಟೆ ಹೂಡಿಕೆ ವಂಚನೆಗಳಿಗೆ ಸಂಬಂಧಿಸಿದ ಲಿಂಕ್‌ಗಳು ಇದರಲ್ಲಿ ಸೇರಿವೆ.
ಕಳೆದ ಎರಡು ವರ್ಷಗಳಲ್ಲಿ ಐ4ಸಿ ಗುರುತಿಸಿರುವ ಬಹುಪಾಲು ಅಕ್ರಮ ಕಂಟೆಂಟ್‌ಗಳು ಅಂತಾರಾಷ್ಟ್ರೀಯ ಆರ್ಥಿಕ ವಂಚನೆಗಳು, ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ದೃಶ್ಯಾವಳಿಗಳು (ಸಿಎಸ್‌ಎಎಂ – CSAM) ಹಾಗೂ ಮಹಿಳೆಯರು ಮತ್ತು ಮಕ್ಕಳ ಮೇಲಿನ ಸೈಬರ್ ಅಪರಾಧಗಳಿಗೆ ಸಂಬಂಧಿಸಿವೆ ಎಂದು ಪಿಐಬಿ ಸ್ಪಷ್ಟಪಡಿಸಿದೆ.
3 ಗಂಟೆಗಳ ಕಟ್ಟುನಿಟ್ಟಿನ ನಿಯಮ:
ಕಾನೂನುಬಾಹಿರ ವಿಷಯಗಳನ್ನು ತ್ವರಿತವಾಗಿ ನಿಯಂತ್ರಿಸಲು ಕೇಂದ್ರ ಸರ್ಕಾರವು 2021ರ ಐಟಿ ಮಧ್ಯವರ್ತಿ ನಿಯಮಗಳಿಗೆ ತಿದ್ದುಪಡಿ ತಂದಿದ್ದು, ಕಂಟೆಂಟ್ ತೆಗೆದುಹಾಕುವ ಕಾಲಮಿತಿಯನ್ನು 36 ಗಂಟೆಗಳಿಂದ ಕೇವಲ 3 ಗಂಟೆಗಳಿಗೆ ಇಳಿಸಿದೆ. ಇದೇ ವೇಳೆ, ಸರ್ಕಾರದ ಮೂರು ಗಂಟೆಗಳ ನಿಯಮವನ್ನು ಪಾಲಿಸಲು ಮೆಟಾ (ಫೇಸ್‌ಬುಕ್/ಇನ್‌ಸ್ಟಾಗ್ರಾಂ) ಸಂಸ್ಥೆಯು ವಿಷಯಗಳನ್ನು ಸ್ವಯಂಚಾಲಿತವಾಗಿ ನಿರ್ಬಂಧಿಸುತ್ತಿದೆ ಎಂಬ ಮಾಧ್ಯಮ ವರದಿಗಳನ್ನು ಪಿಐಬಿ ತಳ್ಳಿಹಾಕಿದ್ದು, ಮೆಟಾ ಕೋರಿಕೆಯ ಮೇರೆಗೆ 2025ರಲ್ಲೇ ಎಪಿಐ (API) ಏಕೀಕರಣ ಮಾಡಲಾಗಿತ್ತು ಎಂದು ಸ್ಪಷ್ಟನೆ ನೀಡಿದೆ.
‘ಸಹಯೋಗ್’ ಪೋರ್ಟಲ್ ಬಳಕೆ:
ಭಾರತದಲ್ಲಿ 60 ಕೋಟಿಗೂ ಅಧಿಕ ಇಂಟರ್ನೆಟ್ ಬಳಕೆದಾರರಿದ್ದು, ಪ್ರತಿ 68 ಸೆಕೆಂಡಿಗೆ ಸುಮಾರು 78,703 ಪೋಸ್ಟ್‌ಗಳು ಅಪ್‌ಲೋಡ್ ಆಗುತ್ತಿವೆ. ಇಂತಹ ಬೃಹತ್ ಜಾಲದಲ್ಲಿ ಸೈಬರ್ ಲೋಕದ ಕಾನೂನುಬಾಹಿರ ಚಟುವಟಿಕೆಗಳನ್ನು ತಡೆಯುವುದು ಅತ್ಯಗತ್ಯವಾಗಿದೆ. ಸಂಬಂಧಪಟ್ಟ ಸಚಿವಾಲಯ ಅಥವಾ ರಾಜ್ಯ ಸರ್ಕಾರಗಳು ಅಧಿಕೃತಗೊಳಿಸಿದ ಅಧಿಕಾರಿಗಳು ಮಾತ್ರ ‘ಸಹಯೋಗ್’ (Sahyog) ಪೋರ್ಟಲ್ ಮೂಲಕ ಅಕ್ರಮ ಲಿಂಕ್‌ಗಳನ್ನು ತೆಗೆದುಹಾಕಲು ಸಾಮಾಜಿಕ ಮಾಧ್ಯಮ ಸಂಸ್ಥೆಗಳಿಗೆ ಸೂಚನೆ ನೀಡಬಹುದಾಗಿದೆ ಎಂದು ತಿಳಿಸಲಾಗಿದೆ.
