ಬಹುಜನ ಸಮಾಜ ಪಕ್ಷದ (ಬಿಎಸ್‌ಪಿ) ಅಧ್ಯಕ್ಷೆ ಮಾಯಾವತಿ ಅವರು 2027ರ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಯನ್ನು ಯಾವುದೇ ಮೈತ್ರಿಯಿಲ್ಲದೆ ಏಕಾಂಗಿಯಾಗಿ ಸ್ಪರ್ಧಿಸುವುದಾಗಿ ಘೋಷಿಸಿದರು.
ಬಿಎಸ್‌ಪಿ ಸಂಸ್ಥಾಪಕ ಕಾನ್ಶಿರಾಮ್ ಅವರ ಪುಣ್ಯತಿಥಿಯಂದು ಗುರುವಾರ ಲಖನೌದಲ್ಲಿ ನಡೆದ ಬೃಹತ್ ಸಮಾವೇಶದಲ್ಲಿ ಮಾತನಾಡಿದ ಅವರು, ತಮ್ಮನ್ನು ಐದನೇ ಬಾರಿಗೆ ಮುಖ್ಯಮಂತ್ರಿಯಾಗಿ ಮಾಡಲು ಕಾರ್ಯಕರ್ತರಿಗೆ ಕರೆ ನೀಡಿದರು.
ಸಮಾಜವಾದಿ ಪಕ್ಷದ ವಿರುದ್ಧ ವಾಗ್ದಾಳಿ
ಮಾಯಾವತಿ ತಮ್ಮ ಭಾಷಣದಲ್ಲಿ ಪ್ರಮುಖ ವಿರೋಧ ಪಕ್ಷವಾದ ಸಮಾಜವಾದಿ ಪಕ್ಷ (ಎಸ್‌ಪಿ) ಮತ್ತು ಅದರ ಅಧ್ಯಕ್ಷ ಅಖಿಲೇಶ್ ಯಾದವ್ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು. ಅಖಿಲೇಶ್ ಅವರನ್ನು “ದ್ವಿಮುಖ ಧೋರಣೆಯುಳ್ಳ ನಾಯಕ” ಎಂದು ಕರೆದ ಅವರು, ದಲಿತರನ್ನು ಆಕರ್ಷಿಸಲು ಕಾನ್ಶಿರಾಮ್ ಅವರ ಚಿಹ್ನೆಗಳನ್ನು ದುರ್ಬಳಕೆ ಮಾಡುತ್ತಿದ್ದಾರೆ . ಎಸ್‌ಪಿ ಆಡಳಿತದಲ್ಲಿ ದಲಿತ, ಅಲ್ಪಸಂಖ್ಯಾತ ಸಮುದಾಯಗಳನ್ನು ಕಡೆಗಣಿಸಲಾಗಿತ್ತು, ಕಾನ್ಶಿರಾಮ್ ಹೆಸರಿನ ಜಿಲ್ಲೆಗಳು ಮತ್ತು ಸಂಸ್ಥೆಗಳ ಹೆಸರುಗಳನ್ನು ಬದಲಾಯಿಸಲಾಗಿತ್ತು. ಅಧಿಕಾರದಿಂದ ಹೊರಗಿದ್ದಾಗ ಕಾನ್ಶಿರಾಮ್ ಕುರಿತು ಸೆಮಿನಾರ್‌ ಯೋಜಿಸುವ ನಾಟಕ ಮಾಡುತ್ತಿದ್ದಾರೆ ಎಂದು ವ್ಯಂಗ್ಯವಾಡಿದರು.
ಬಿಜೆಪಿ ಸರ್ಕಾರಕ್ಕೆ ಮೆಚ್ಚುಗೆ
ಯೋಗಿ ಆದಿತ್ಯನಾಥ್ ನೇತೃತ್ವದ ರಾಜ್ಯ ಬಿಜೆಪಿ ಸರ್ಕಾರವನ್ನು ಮಾಯಾವತಿ ಇದೇ ಸಂದರ್ಭದಲ್ಲಿ ಶ್ಲಾಘಿಸಿದರು. ಕಾನ್ಶಿರಾಮ್ ಸ್ಮಾರಕಗಳ ನಿರ್ವಹಣೆಗೆ ಟಿಕೆಟ್ ಮಾರಾಟದಿಂದ ಬಂದ ಹಣವನ್ನು ಬಿಡುಗಡೆ ಮಾಡಿದ್ದಕ್ಕಾಗಿ ಬಿಎಸ್‌ಪಿ ಕೃತಜ್ಞವಾಗಿದೆ. ಆದರೆ, ಕೇಂದ್ರದ ಬಿಜೆಪಿ ಸರ್ಕಾರ ಸಿಬಿಐ ಮತ್ತು ಆದಾಯ ತೆರಿಗೆ ಇಲಾಖೆಯ ಮೂಲಕ ತಮ್ಮನ್ನು ಮತ್ತು ಕುಟುಂಬವನ್ನು ಸುಳ್ಳು ಪ್ರಕರಣಗಳಲ್ಲಿ ಸಿಲುಕಿಸಿ ಕಳಂಕಿತಗೊಳಿಸುವ ಯತ್ನ ಮಾಡುತ್ತಿದೆ ಎಂದರು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಸಂವಿಧಾನ ಬದಲಿಸುವ ಸನಾತನಿಗಳ ಹುನ್ನಾರಕ್ಕೆ ವಕೀಲರೇ ದಾಳ
ಕಾಂಗ್ರೆಸ್ ವಿರುದ್ಧ ಟೀಕೆ
ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರನ್ನು ಹೆಸರಿಸದೆ ಟೀಕಿಸಿದ ಮಾಯಾವತಿ, ಸಾರ್ವಜನಿಕ ಸಭೆಗಳಲ್ಲಿ ಸಂವಿಧಾನದ ಪ್ರತಿಯನ್ನು ತೋರಿಸುವುದನ್ನು “ನಾಟಕ” ಎಂದು ಕರೆದರು. “ತುರ್ತು ಪರಿಸ್ಥಿತಿಯ ಸಂದರ್ಭದಲ್ಲಿ ಕಾಂಗ್ರೆಸ್ ಸರ್ಕಾರವು ಅಂಬೇಡ್ಕರ್ ಅವರ ಸಂವಿಧಾನವನ್ನು ಅರ್ಥಹೀನಗೊಳಿಸಿತ್ತು. ಆದರೆ ಈಗ ಅದೇ ಸಂವಿಧಾನವನ್ನು ಕೈಯಲ್ಲಿ ಹಿಡಿದು ನಾಟಕ ಮಾಡುತ್ತಿದ್ದಾರೆ. ಕಾಂಗ್ರೆಸ್ ಸರ್ಕಾರವು ಅಂಬೇಡ್ಕರ್ ಅವರಿಗೆ ಸಂಸತ್‌ಗೆ ಆಯ್ಕೆಯಾಗದಂತೆ ತಡೆದಿತ್ತು, ಭಾರತ ರತ್ನ ನೀಡಲಿಲ್ಲ ಮತ್ತು ಕಾನ್ಶಿರಾಮ್ ಅವರ ನಿಧನದ ವೇಳೆ ರಾಜ್ಯದಲ್ಲಿ ಶೋಕ ದಿನಾಚರಣೆ ಘೋಷಿಸಲಿಲ್ಲ ಎಂದು ವಾಗ್ದಾಳಿ ನಡೆಸಿದರು.
ಹೊಸ ದಲಿತ ನಾಯಕರಿಗೆ ಎಚ್ಚರಿಕೆ
ಕಾನ್ಶಿರಾಮ್ ಅವರ ಏಕೈಕ ಉತ್ತರಾಧಿಕಾರಿಯಾಗಿ ತಮ್ಮನ್ನು ಘೋಷಿಸಿಕೊಂಡ ಮಾಯಾವತಿ, ಹೊಸ ದಲಿತ ನಾಯಕರು ಮತ್ತು ಅವರ ಪಕ್ಷಗಳಿಗೆ ಮಣೆ ಹಾಕಬಾರದೆಂದು ಮತದಾರರಿಗೆ ಕರೆ ನೀಡಿದರು. ದಲಿತ ಮತಗಳನ್ನು ವಿಭಜಿಸಿ ದುರ್ಬಳಕೆ ಮಾಡುವ ಷಡ್ಯಂತ್ರ ಅಡಗಿದೆ. ಸಂಸದ ಚಂದ್ರಶೇಖರ್ ಆಜಾದ್‌ ಅವರಂತಹ ಸ್ವಾರ್ಥಿಗಳಿಗೆ ಮತ ಹಾಕಬೇಡಿ, ಇದು ವಿರೋಧಿಗಳಿಗೆ ಲಾಭವಾಗುತ್ತದೆ ಎಂದು ಹೇಳಿದರು.
ಮೈತ್ರಿಗಳಿಲ್ಲದೆ ಹೋರಾಟ
ಮೈತ್ರಿಗಳಿಂದ ನಮಗೆ ಲಾಭವಾಗಿಲ್ಲ. ನಮ್ಮ ಮತಗಳು ಇತರರಿಗೆ ಹೋಗಿವೆ, ಆದರೆ ಅವರ ಜಾತಿ ಮತಗಳು ನಮಗೆ ಬಂದಿಲ್ಲ. 1993 ಮತ್ತು 1997ರಲ್ಲಿ ಎಸ್‌ಪಿ ಮತ್ತು ಕಾಂಗ್ರೆಸ್‌ನೊಂದಿಗಿನ ಮೈತ್ರಿಗಳಿಂದ ಯಶಸ್ಸಾಗಿಲ್ಲ. 2007ರಲ್ಲಿ ಏಕಾಂಗಿಯಾಗಿ ಸ್ಪರ್ಧಿಸಿ 403 ಸ್ಥಾನಗಳಲ್ಲಿ 206 ಗೆದ್ದು ಬಹುಮತ ಸರ್ಕಾರ ರಚಿಸಿದ್ದೇವೆ. 2007-12ರ ತಮ್ಮ ಆಡಳಿತದಲ್ಲಿ ದಲಿತರು, ಬುಡಕಟ್ಟು, ಹಿಂದುಳಿದವರು, ಅಲ್ಪಸಂಖ್ಯಾತರಿಗೆ ಕೆಲಸ ಮಾಡಿದ್ದೇವೆ. ಶತ್ರುಗಳು ಇದನ್ನು ಇಷ್ಟಪಡದೆ ಬಿಎಸ್‌ಪಿಯನ್ನು ದುರ್ಬಲಗೊಳಿಸಿದ್ದಾರೆ. ಇದಕ್ಕಾಗಿ 2027ರಲ್ಲಿ ಏಕಾಂಗಿಯಾಗಿ ಸ್ಪರ್ಧಿಸುವ ನಿರ್ಧಾರ ಕೈಗೊಂಡಿದ್ದೇವೆ. ಪಕ್ಷದ ಸಮನ್ವಯಕಾರ ತಮ್ಮ ಅಕಾಶ್ ಆನಂದ್‌ಗೆ ಕಾರ್ಯಕರ್ತರು ಬೆಂಬಲ ನೀಡಬೇಕು. ನನಗೆ ಬೆಂಬಲ ನೀಡಿದಂತೆ ಅಕಾಶ್ ಅವರಿಗೂ ಬೆಂಬಲ ನೀಡುವಂತೆ ಕಾರ್ಯಕರ್ತರಿಗೆ ಮನವಿ ಮಾಡಿದರು
