ಅಲಿ ಲಾರಿಜಾನಿ ಅವರನ್ನು ದೈಹಿಕವಾಗಿ ಮುಗಿಸುವಲ್ಲಿ ಅಮೆರಿಕ ಯಶಸ್ವಿಯಾಗಿರಬಹುದು, ಆದರೆ ಅವರ ಆದರ್ಶ ಮತ್ತು ಪ್ರತಿರೋಧದ ಕಿಡಿಯನ್ನು ಎಂದಿಗೂ ನಂದಿಸಲು ಸಾಧ್ಯವಿಲ್ಲ. ಲಾರಿಜಾನಿ ಅವರ ಈ ಬಲಿದಾನವು ಸಾಮ್ರಾಜ್ಯಶಾಹಿ ಶಕ್ತಿಗಳ ವಿರುದ್ಧ ಹೋರಾಡಲು ಇರಾನ್ ಮತ್ತು ಜಗತ್ತಿನೆಲ್ಲೆಡೆ ಹೊಸ ತಲೆಮಾರಿಗೆ ದಾರಿದೀಪವಾಗಲಿದೆ
ಇರಾನ್‌ನ ಅತ್ಯಂತ ಪ್ರಭಾವಿ ಮುತ್ಸದ್ದಿ ಹಾಗೂ ರಾಷ್ಟ್ರೀಯ ಭದ್ರತಾ ಮಂಡಳಿಯ ಕಾರ್ಯದರ್ಶಿ ಅಲಿ ಲಾರಿಜಾನಿ ಅವರ ಹತ್ಯೆಯು ಕೇವಲ ಇರಾನ್‌ಗೆ ಮಾತ್ರವಲ್ಲ, ಇಡೀ ಪ್ರಜಾಸತ್ತಾತ್ಮಕ ಹಾಗೂ ಸಾರ್ವಭೌಮ ಜಗತ್ತಿಗೆ ಒದಗಿದ ಬಹುದೊಡ್ಡ ಆಘಾತವಾಗಿದೆ. ತಮ್ಮ ಇಡೀ ಜೀವನವನ್ನು ದೇಶದ ಉಳಿವು ಮತ್ತು ಏಳಿಗೆಗಾಗಿ ಮುಡಿಪಾಗಿಟ್ಟಿದ್ದ ಲಾರಿಜಾನಿ, ಪಾಶ್ಚಿಮಾತ್ಯರ ಕುತಂತ್ರಗಳಿಗೆ ಎಂದಿಗೂ ಮಣಿಯದ ಅಪ್ರತಿಮ ದೇಶಭಕ್ತರಾಗಿದ್ದರು. ಅವರ ಮೇಲಿನ ಈ ಹೇಡಿತನದ ದಾಳಿಯು ಅಮೆರಿಕ ಮತ್ತು ಅದರ ಮಿತ್ರರಾಷ್ಟ್ರಗಳ ಅಮಾನವೀಯ ಹಾಗೂ ರಕ್ತಪಿಪಾಸು ನೀತಿಯನ್ನು ಮತ್ತೊಮ್ಮೆ ಜಗತ್ತಿನೆದುರು ಬೆತ್ತಲಾಗಿಸಿದೆ.
1958ರಲ್ಲಿ ಜನಿಸಿದ ಲಾರಿಜಾನಿ ಕೇವಲ ಒಬ್ಬ ರಾಜಕಾರಣಿಯಾಗಿರಲಿಲ್ಲ; ಬದಲಾಗಿ ಅವರೊಬ್ಬ ಅತ್ಯುತ್ತಮ ದಾರ್ಶನಿಕ ಮತ್ತು ತತ್ವಜ್ಞಾನಿಯಾಗಿದ್ದರು. ಇರಾನ್‌ನ ಇಸ್ಲಾಮಿಕ್ ಕ್ರಾಂತಿಯ ಮೌಲ್ಯಗಳನ್ನು ಆಳವಾಗಿ ಮೈಗೂಡಿಸಿಕೊಂಡಿದ್ದ ಅವರು, ಸಂಸ್ಕೃತಿಕ ಹಾಗೂ ಇಸ್ಲಾಂ ಮಾರ್ಗದರ್ಶಕ ಸಚಿವರಾಗಿ, ಮಾಧ್ಯಮಗಳ ಮುಖ್ಯಸ್ಥರಾಗಿ ದೇಶದ ಬೌದ್ಧಿಕ ಮತ್ತು ಸಾಂಸ್ಕೃತಿಕ ಅಡಿಪಾಯವನ್ನು ಗಟ್ಟಿಗೊಳಿಸಿದರು. ಬಿಕ್ಕಟ್ಟಿನ ಸಮಯದಲ್ಲೂ ಅತ್ಯಂತ ಸಂಯಮದಿಂದ, ಪ್ರಬುದ್ಧತೆಯಿಂದ ಹೆಜ್ಜೆ ಇಡುತ್ತಿದ್ದ ಅವರ ನಾಯಕತ್ವವು ಇರಾನ್‌ನ ಭದ್ರತಾ ಕೋಟೆಯನ್ನು ಅಭೇದ್ಯವಾಗಿ ಕಾಯ್ದುಕೊಂಡಿತ್ತು.
ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಲಾರಿಜಾನಿ ಅವರ ರಾಜತಾಂತ್ರಿಕ ಕೌಶಲ್ಯವು ಪಾಶ್ಚಿಮಾತ್ಯ ರಾಷ್ಟ್ರಗಳ ಪಾಲಿಗೆ ಸಿಂಹಸ್ವಪ್ನವಾಗಿತ್ತು. 2005 ರಿಂದ 2007ರ ಅವಧಿಯಲ್ಲಿ ಇರಾನ್‌ನ ಪರಮಾಣು ಸಂಧಾನಕಾರರಾಗಿ ಅವರು ಅಮೆರಿಕದ ಬೆದರಿಕೆಗಳಿಗೆ ಬಗ್ಗದೆ, ತಮ್ಮ ದೇಶದ ಪರಮಾಣು ಹಕ್ಕುಗಳನ್ನು ದಿಟ್ಟತನದಿಂದ ಸಮರ್ಥಿಸಿಕೊಂಡರು. ಪಾಶ್ಚಿಮಾತ್ಯರು ನೀಡಿದ್ದ ಮೋಸದ ಪ್ರಸ್ತಾಪಗಳನ್ನು “ಮುತ್ತನ್ನು ಕೊಟ್ಟು ಕ್ಯಾಂಡಿ ಪಡೆದಂತೆ” ಎಂದು ಕಟುವಾಗಿ ಟೀಕಿಸುವ ಮೂಲಕ, ತಮ್ಮ ದೇಶದ ಸಾರ್ವಭೌಮತೆಯನ್ನು ಯಾವುದೇ ಕಾರಣಕ್ಕೂ ಮಾರಿಕೊಳ್ಳುವುದಿಲ್ಲ ಎಂಬುದನ್ನು ಅತ್ಯಂತ ಸ್ಪಷ್ಟವಾಗಿ ಮತ್ತು ಹೆಮ್ಮೆಯಿಂದ ಪ್ರತಿಪಾದಿಸಿದ್ದರು.
ಸತತ ಹನ್ನೆರಡು ವರ್ಷಗಳ ಕಾಲ (2008-2020) ಇರಾನ್ ಸಂಸತ್ತಿನ ಸ್ಪೀಕರ್ ಆಗಿ ಕಾರ್ಯನಿರ್ವಹಿಸಿದ ಲಾರಿಜಾನಿ, ಆಡಳಿತಾತ್ಮಕ ಮತ್ತು ಶಾಸಕಾಂಗ ವ್ಯವಸ್ಥೆಯಲ್ಲಿ ಅಸಾಧಾರಣ ಸ್ಥಿರತೆಯನ್ನು ತಂದರು. ಆಂತರಿಕ ಭಿನ್ನಾಭಿಪ್ರಾಯಗಳನ್ನು ಶಮನಗೊಳಿಸಿ, ವಿಭಿನ್ನ ರಾಜಕೀಯ ಗುಂಪುಗಳನ್ನು ಒಗ್ಗೂಡಿಸಿ ಮುನ್ನಡೆಸುವಲ್ಲಿ ಅವರ ಪಾತ್ರ ನಿರ್ಣಾಯಕವಾಗಿತ್ತು. ಇರಾನ್‌ನ ಪ್ರತಿಯೊಂದು ಸಂಕಷ್ಟದ ಸಮಯದಲ್ಲೂ ಅವರು ಅಚಲವಾದ ಆಧಾರಸ್ತಂಭವಾಗಿ ನಿಂತು ದೇಶವನ್ನು ಮುನ್ನಡೆಸಿದ ರೀತಿ ಅಸಾಮಾನ್ಯವಾದದ್ದು.
ಇದನ್ನು ಓದಿದ್ದೀರಾ? ಸುಳ್ಳೇ ಬಂಡವಾಳ, ಯುದ್ಧವೇ ವ್ಯಾಪಾರ: ಸೋತು ಸುಣ್ಣವಾದರೂ ತೀರದ ಅಮೆರಿಕದ ಅಹಂಕಾರ
ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರ ದುರಂತ ಸಾವಿನ ನಂತರ, ದಿಕ್ಕುತೋಚದಂತಾಗಿದ್ದ ಇರಾನ್ ಜನತೆಗೆ ನೈತಿಕ ಮತ್ತು ಆಡಳಿತಾತ್ಮಕ ನಾಯಕರಾಗಿ ಲಾರಿಜಾನಿ ಭರವಸೆಯ ಬೆಳಕಾಗಿದ್ದರು. ದೇಶದ ಭದ್ರತೆ, ರಾಜತಾಂತ್ರಿಕತೆ ಮತ್ತು ಆರ್ಥಿಕ ಸವಾಲುಗಳನ್ನು ಒಂಟಿಸಲಗದಂತೆ ನಿಭಾಯಿಸುತ್ತಿದ್ದ ‘ಅಘೋಷಿತ ನಾಯಕ’ನಾಗಿದ್ದ ಅವರನ್ನು ಎದುರಿಸಲು ಅಮೆರಿಕಕ್ಕೆ ನೇರ ಯುದ್ಧರಂಗದಲ್ಲಿ ಸಾಧ್ಯವಾಗಲಿಲ್ಲ. ಇದೇ ಕಾರಣಕ್ಕೆ ಒಳಸಂಚು ರೂಪಿಸಿ, ನಿರಾಯುಧ ಸ್ಥಿತಿಯಲ್ಲಿದ್ದಾಗ ಈ ಪಾತಕ ಕೃತ್ಯವೆಸಗಲಾಗಿದೆ.
ಈ ಹತ್ಯೆಯ ಮೂಲಕ ಅಮೆರಿಕವು ತಾನೊಂದು ಜಾಗತಿಕ ಗೂಂಡಾ ರಾಷ್ಟ್ರ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ. ಪ್ರಜಾಪ್ರಭುತ್ವ ಮತ್ತು ಮಾನವ ಹಕ್ಕುಗಳ ಬಗ್ಗೆ ಬೂಟಾಟಿಕೆಯ ಭಾಷಣ ಮಾಡುವ ಅಮೆರಿಕದ ಕೈಗಳು, ವಿಶ್ವದಾದ್ಯಂತ ಅಸಂಖ್ಯಾತ ಮುಗ್ಧರ ಮತ್ತು ಮುತ್ಸದ್ದಿಗಳ ರಕ್ತದಿಂದ ಒದ್ದೆಯಾಗಿವೆ. ಬೇರೊಂದು ಸಾರ್ವಭೌಮ ರಾಷ್ಟ್ರದ ಉನ್ನತ ನಾಯಕನನ್ನು ಕೊಲ್ಲುವುದು ಅಂತಾರಾಷ್ಟ್ರೀಯ ಕಾನೂನುಗಳ ಸ್ಪಷ್ಟ ಉಲ್ಲಂಘನೆಯಾಗಿದ್ದರೂ, ಅಮೆರಿಕ ತನ್ನ ಸಾಮ್ರಾಜ್ಯಶಾಹಿ ದರ್ಪದಿಂದ ಯಾವುದೇ ನಿಯಮಗಳನ್ನು ಲೆಕ್ಕಿಸುತ್ತಿಲ್ಲ.
ಅಮೆರಿಕದ ಈ ವಿನಾಶಕಾರಿ ವಿದೇಶಾಂಗ ನೀತಿಯು ಕೇವಲ ಪಶ್ಚಿಮ ಏಷ್ಯಾಕ್ಕೆ ಸೀಮಿತವಾಗಿಲ್ಲ; ಇದು ಜಾಗತಿಕ ಮಟ್ಟದಲ್ಲಿ ಅಸ್ಥಿರತೆಯನ್ನು ಬಿತ್ತುತ್ತಿದೆ. ಲ್ಯಾಟಿನ್ ಅಮೆರಿಕದ ವೆನೆಜುವೆಲಾದ ಆಂತರಿಕ ವ್ಯವಹಾರಗಳಲ್ಲಿ ನಿರಂತರ ಹಸ್ತಕ್ಷೇಪ ಮಾಡಿ ಅಲ್ಲಿನ ಪ್ರಜಾಸತ್ತಾತ್ಮಕ ವ್ಯವಸ್ಥೆಯನ್ನು ಅಸ್ಥಿರಗೊಳಿಸಲು ಯತ್ನಿಸಿದ್ದು, ಹಾಗೂ ಭೌಗೋಳಿಕ ಸಂಪನ್ಮೂಲದ ದುರಾಸೆಯಿಂದ ಗ್ರೀನ್‌ಲ್ಯಾಂಡ್‌ನಂತಹ ಪ್ರದೇಶದ ಮೇಲೂ ವಿಸ್ತರಣಾವಾದಿ ಕಣ್ಣು ಹಾಕಿದ್ದು ಅದರ ಅಹಂಕಾರದ ಪರಮಾವಧಿಯಾಗಿದೆ. ತನಗೆ ತಲೆಬಾಗದ ಯಾವುದೇ ರಾಷ್ಟ್ರವನ್ನು ಆರ್ಥಿಕ ದಿಗ್ಬಂಧನ ಅಥವಾ ಮಿಲಿಟರಿ ಬಲದಿಂದ ಹೊಸಕಿಹಾಕುವ ಅಮೆರಿಕದ ಈ ರಕ್ತಪಿಪಾಸು ನೀತಿ ಇಡೀ ಜಗತ್ತಿಗೆ ಮಾರಕವಾಗಿದೆ.
ಅಲಿ ಲಾರಿಜಾನಿ ಅವರಂತಹ ಜನಾನುರಾಗಿ ನಾಯಕನ ಬಗ್ಗೆ ಮಾಹಿತಿ ನೀಡಿದವರಿಗೆ ಅಮೆರಿಕ 10 ದಶಲಕ್ಷ ಡಾಲರ್ ಬಹುಮಾನ ಘೋಷಿಸಿದ್ದು ಅದರ ಹತಾಶೆ ಮತ್ತು ನೈತಿಕ ದಿವಾಳಿತನವನ್ನು ತೋರಿಸುತ್ತದೆ. ಒಂದು ಸ್ವತಂತ್ರ ದೇಶದ ಸಂವಿಧಾನಾತ್ಮಕ ಹುದ್ದೆಯಲ್ಲಿರುವ, ಜನರ ಅಪಾರ ಪ್ರೀತಿ ಗಳಿಸಿದ ನಾಯಕನ ತಲೆಗೆ ಬೆಲೆ ಕಟ್ಟುವ ಅಮೆರಿಕದ ಈ ನಡೆ, ಭಯೋತ್ಪಾದಕ ಸಂಘಟನೆಗಳ ವರ್ತನೆಗಿಂತ ಯಾವುದೇ ರೀತಿಯಲ್ಲೂ ಭಿನ್ನವಾಗಿಲ್ಲ. ಇದು ಅಂತಾರಾಷ್ಟ್ರೀಯ ರಾಜಕಾರಣವನ್ನು ಅಮೆರಿಕ ಎಷ್ಟು ಕೀಳು ಮಟ್ಟಕ್ಕೆ ಇಳಿಸಿದೆ ಎಂಬುದರ ಜ್ವಲಂತ ನಿದರ್ಶನವಾಗಿದೆ.
ಅಲಿ ಲಾರಿಜಾನಿ ಅವರನ್ನು ದೈಹಿಕವಾಗಿ ಮುಗಿಸುವಲ್ಲಿ ಅಮೆರಿಕ ಯಶಸ್ವಿಯಾಗಿರಬಹುದು, ಆದರೆ ಅವರ ಆದರ್ಶ ಮತ್ತು ಪ್ರತಿರೋಧದ ಕಿಡಿಯನ್ನು ಎಂದಿಗೂ ನಂದಿಸಲು ಸಾಧ್ಯವಿಲ್ಲ. ಲಾರಿಜಾನಿ ಅವರ ಈ ಬಲಿದಾನವು ಸಾಮ್ರಾಜ್ಯಶಾಹಿ ಶಕ್ತಿಗಳ ವಿರುದ್ಧ ಹೋರಾಡಲು ಇರಾನ್ ಮತ್ತು ಜಗತ್ತಿನೆಲ್ಲೆಡೆ ಹೊಸ ತಲೆಮಾರಿಗೆ ದಾರಿದೀಪವಾಗಲಿದೆ. ಮತ್ತೊಂದೆಡೆ, ಅಮೆರಿಕದ ಈ ಹೇಯ ಕೃತ್ಯವು ಇತಿಹಾಸದ ಕಪ್ಪು ಪುಟಗಳಲ್ಲಿ ಶಾಶ್ವತವಾಗಿ ದಾಖಲಾಗಲಿದ್ದು, ನಾಗರಿಕ ಜಗತ್ತು ಇದನ್ನು ಸದಾ ಖಂಡಿಸುತ್ತಲೇ ಇರುತ್ತದೆ.
