ಆರ್‌ಸಿಬಿ ಈಗಾಗಲೇ ಮದ್ಯದ ಕಂಪನಿಗಳ ಒಡೆತನದಿಂದಾಗಿ ‘ಬಾರ್‌ಸಿಬಿ’ ಎಂಬ ಟೀಕೆಗಳನ್ನು ಎದುರಿಸಿತ್ತು. ಈಗ ಲಸಿಕೆ ಲಾಭಕೋರತನದ ಆರೋಪ ಹೊತ್ತಿರುವ ಪೂನಾವಾಲಾ ಕೈಗೆ ತಂಡ ಸೇರಿದರೆ, ತಂಡದ ವರ್ಚಸ್ಸು ಪಾತಾಳಕ್ಕೆ ಕುಸಿಯುವ ಭೀತಿಯಿದೆ. 11 ಅಭಿಮಾನಿಗಳ ಸಾವಿನ ಕಳಂಕ ಹೊತ್ತಿರುವ ತಂಡವನ್ನು, ಜನರ ಸಂಕಷ್ಟದಲ್ಲಿ ಲಾಭ ಮಾಡಿಕೊಂಡ ವ್ಯಕ್ತಿಯೊಬ್ಬ ಖರೀದಿಸಿದರೆ ಅದು ದುರಂತದ ಪರಮಾವಧಿ
ದೇಶವೇ ಕೊರೋನಾ ಹೆಮ್ಮಾರಿಯ ಕರಾಳ ನೃತ್ಯಕ್ಕೆ ತತ್ತರಿಸಿ ಸ್ಮಶಾನ ಸದೃಶವಾಗಿದ್ದಾಗ, ಲಸಿಕೆಯ ಅನಿವಾರ್ಯತೆಯನ್ನೇ ಬಂಡವಾಳ ಮಾಡಿಕೊಂಡು ಜನಸಾಮಾನ್ಯರ ಜೇಬು ಕತ್ತರಿಸಿ, ಆ ಹಣದಲ್ಲಿ ಲಂಡನ್‌ನಲ್ಲಿ 1400 ಕೋಟಿ ರೂ.ಗಳ ಐಷಾರಾಮಿ ಬಂಗಲೆ ಖರೀದಿಸಿ ಮೋಜಿನ ಜೀವನ ನಡೆಸುತ್ತಿರುವ ‘ವ್ಯಾಕ್ಸಿನ್ ಪ್ರಿನ್ಸ್’ ಆದಾರ್ ಪೂನಾವಾಲಾ ಮತ್ತೆ ಸುದ್ದಿಯಲ್ಲಿದ್ದಾರೆ. ಈಗ ಐಪಿಎಲ್‌ನ ಕನ್ನಡಿಗರ ತಂಡ ಎಂದೇ ಹೆಸರಾಗಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡವನ್ನು ಖರೀದಿಸಲು ಮುಂದಾಗಿರುವುದು ಕ್ರೀಡಾಭಿಮಾನಿಗಳಲ್ಲಿ ಆತಂಕ ಮತ್ತು ಆಕ್ರೋಶಕ್ಕೆ ಕಾರಣವಾಗಿದೆ.
ಕಳೆದ ವರ್ಷವಷ್ಟೇ (2025) ಆರ್‌ಸಿಬಿ ತನ್ನ ಬಹುಕಾಲದ ಕನಸಿನ ಐಪಿಎಲ್ ಟ್ರೋಫಿಯನ್ನು ಗೆದ್ದಿತಾದರೂ, ಆ ಸಂಭ್ರಮಾಚರಣೆಯು 11 ಮುಗ್ಧ ಅಭಿಮಾನಿಗಳ ದುರಂತ ಸಾವಿನ ಮೂಲಕ ‘ರಕ್ತಸಿಕ್ತ’ ಅಧ್ಯಾಯವಾಗಿ ಇತಿಹಾಸ ಸೇರಿತು. ಈ 11 ಸಾವುಗಳ ಕಳಂಕ ಇನ್ನೂ ಹಸಿಹಸಿಯಾಗಿರುವಾಗಲೇ, ಈಗ ವಿವಾದಾತ್ಮಕ ಉದ್ಯಮಿಯೊಬ್ಬರ ಪ್ರವೇಶವು ತಂಡದ ಮೇಲಿರುವ ಕಳಂಕವನ್ನು ಮತ್ತಷ್ಟು ಹೆಚ್ಚಿಸುವ ಸಾಧ್ಯತೆಯಿದೆ ಎಂಬ ಮಾತುಗಳು ಕ್ರಿಕೆಟ್ ವಲಯದಲ್ಲಿ ಕೇಳಿಬರುತ್ತಿವೆ.
ಲಸಿಕೆ ಲೂಟಿ ಮತ್ತು ಲಂಡನ್ ಪಲಾಯನ!
ಆದಾರ್ ಪೂನಾವಾಲಾ ಅವರ ಸೀರಮ್ ಇನ್‌ಸ್ಟಿಟ್ಯೂಟ್ ತಯಾರಿಸಿದ ಕೋವಿಶೀಲ್ಡ್ ಲಸಿಕೆ, ಸಾಂಕ್ರಾಮಿಕದ ಸಮಯದಲ್ಲಿ ಜಗತ್ತಿನ ಅತಿ ದೊಡ್ಡ ವ್ಯಾಪಾರವಾಗಿ ಪರಿಣಮಿಸಿತು. ಸರ್ಕಾರಕ್ಕೆ ಒಂದು ದರ, ಖಾಸಗಿ ಆಸ್ಪತ್ರೆಗಳಿಗೆ ದುಬಾರಿ ದರ ನಿಗದಿಪಡಿಸಿ, ಜನರ ಪ್ರಾಣಭಯವನ್ನೇ ಲಾಭದ ಸರಕಾಗಿಸಿಕೊಂಡ ಆರೋಪ ಪೂನಾವಾಲಾ ಮೇಲಿದೆ. ದೇಶದಲ್ಲಿ ಬೆಡ್‌ಗಳಿಲ್ಲದೆ, ಆಕ್ಸಿಜನ್ ಇಲ್ಲದೆ ಜನ ನರಳಾಡುತ್ತಿದ್ದಾಗ, ಇತ್ತ ಪೂನಾವಾಲಾ ತಮ್ಮ ಸಂಪತ್ತನ್ನು ಬಹುಪಟ್ಟು ಹೆಚ್ಚಿಸಿಕೊಂಡರು.
ಅಷ್ಟೇ ಅಲ್ಲ, ತಮಗೆ ಭಾರತದಲ್ಲಿ ‘ಬೆದರಿಕೆ’ ಇದೆ ಎಂಬ ನೆಪವೊಡ್ಡಿ ಲಂಡನ್‌ಗೆ ಹಾರಿದ ಅವರು, ಅಲ್ಲಿನ ಮೇಫೇರ್‌ನಲ್ಲಿ ಬರೋಬ್ಬರಿ 1446 ಕೋಟಿ ರೂಪಾಯಿ ಮೌಲ್ಯದ ಐಷಾರಾಮಿ ‘ಅಬರ್‌ಕಾನ್ವೇ ಹೌಸ್’ ಖರೀದಿಸಿ, ಅಲ್ಲಿಯೇ ನೆಲೆನಿಂತರು. ಭಾರತದ ಮಣ್ಣಿನ ಸಂಪನ್ಮೂಲ ಮತ್ತು ಇಲ್ಲಿನ ಜನರ ಹಣದಿಂದ ಸಾಮ್ರಾಜ್ಯ ಕಟ್ಟಿ, ಕಷ್ಟಕಾಲದಲ್ಲಿ ದೇಶ ತೊರೆದು ವಿದೇಶಿ ಮೋಜಿನಲ್ಲಿ ಮುಳುಗಿದ ಪೂನಾವಾಲಾ, ಈಗ ಅದೇ ಭಾರತದ ಅತ್ಯಂತ ಜನಪ್ರಿಯ ಐಪಿಎಲ್ ತಂಡದ ಮೇಲೆ ಕಣ್ಣಿಟ್ಟಿರುವುದು ಅವರ ಅತಿಯಾದ ವ್ಯಾಪಾರಿ ಮನಸ್ಥಿತಿಯನ್ನು ತೋರಿಸುತ್ತದೆ.
11 ಸಾವುಗಳ ಕಳಂಕ ಮತ್ತು ಆರ್‌ಸಿಬಿ
ಕಳೆದ ಜೂನ್ 2025ರಲ್ಲಿ ಆರ್‌ಸಿಬಿ ಐಪಿಎಲ್ ಗೆದ್ದಾಗ ನಡೆದ ಸಂಭ್ರಮಾಚರಣೆಯಲ್ಲಿ ಉಂಟಾದ ಕಾಲ್ತುಳಿತದಲ್ಲಿ 11 ಜನ ಅಮಾಯಕ ಅಭಿಮಾನಿಗಳು ಪ್ರಾಣ ಕಳೆದುಕೊಂಡಿದ್ದು ಇನ್ನೂ ಯಾರೂ ಮರೆತಿಲ್ಲ. ಆರ್‌ಸಿಬಿಯ ಟ್ರೋಫಿಯ ಮೇಲೆ ಈ 11 ಜನರ ನೆತ್ತರಿನ ಕಲೆ ಶಾಶ್ವತವಾಗಿ ಉಳಿದಿದೆ. ಮದ್ಯದ ದೊರೆಗಳ ಕಪಿಮುಷ್ಟಿಯಲ್ಲಿದ್ದ ತಂಡವು, ಆ ದುರಂತದ ನಂತರ ನೈತಿಕವಾಗಿ ಕುಗ್ಗಿಹೋಗಿದೆ. ಇಂತಹ ಸಂದರ್ಭದಲ್ಲಿ, ತಂಡಕ್ಕೆ ಬೇಕಿರುವುದು ಕ್ರೀಡಾ ಸ್ಫೂರ್ತಿಯನ್ನು ಎತ್ತಿಹಿಡಿಯುವ, ಅಭಿಮಾನಿಗಳ ನೋವಿಗೆ ಸ್ಪಂದಿಸುವ ಮಾಲೀಕರೇ ಹೊರತು, ಪ್ರತಿಯೊಂದರಲ್ಲೂ ಲಾಭದ ಲೆಕ್ಕಾಚಾರ ಹಾಕುವ ಕಾರ್ಪೊರೇಟ್ ಕುಳಗಳಲ್ಲ.
ಇದನ್ನು ಒದಿದ್ದೀರಾ? ದಾಖಲೆಗಳನ್ನು ಬರೆದರೂ ವೈಭವ್‌ಗೆ ಟೀಂ ಇಂಡಿಯಾದಲ್ಲಿ ಸ್ಥಾನವಿಲ್ಲ; ಐಸಿಸಿ ನಿಯಮ ಅಡ್ಡಿಯಾಗಿದ್ದು ಹೇಗೆ?
ಆದರೆ, ಡಿಯಾಜಿಯೊ (Diageo) ಕಂಪನಿ ತಂಡವನ್ನು ಮಾರಾಟಕ್ಕಿಟ್ಟ ತಕ್ಷಣವೇ ಹದ್ದುಗಳಂತೆ ಮುಗಿಬಿದ್ದವರಲ್ಲಿ ಪೂನಾವಾಲಾ ಮೊದಲಿಗರು. ಈಗಾಗಲೇ ಲಸಿಕೆ ಲಾಭದ ಹಣದಲ್ಲಿ ವಿದೇಶಿ ಬಂಗಲೆ ಸೇರಿರುವ ಅವರಿಗೆ, ಆರ್‌ಸಿಬಿ ಎಂಬುದು ಕನ್ನಡಿಗರ ಅಭಿಮಾನದ ತಂಡವಾಗಿ ಕಾಣುತ್ತಿಲ್ಲ; ಬದಲಿಗೆ ಇದೊಂದು ಮತ್ತಷ್ಟು ಹಣ ಹೂಡಿ, ದುಪ್ಪಟ್ಟು ಲಾಭ ಗಳಿಸುವ ‘ಅಸೆಟ್’ (Asset) ಆಗಿ ಮಾತ್ರ ಕಾಣುತ್ತಿದೆ.
ಕಳಂಕದ ಮೇಲೆ ಮತ್ತಷ್ಟು ಕಳಂಕ?
ಆರ್‌ಸಿಬಿ ಈಗಾಗಲೇ ಮದ್ಯದ ಕಂಪನಿಗಳ ಒಡೆತನದಿಂದಾಗಿ ‘ಬಾರ್‌ಸಿಬಿ’ ಎಂಬ ಟೀಕೆಗಳನ್ನು ಎದುರಿಸಿತ್ತು. ಈಗ ಲಸಿಕೆ ಲಾಭಕೋರತನದ ಆರೋಪ ಹೊತ್ತಿರುವ ಪೂನಾವಾಲಾ ಕೈಗೆ ತಂಡ ಸೇರಿದರೆ, ತಂಡದ ವರ್ಚಸ್ಸು ಪಾತಾಳಕ್ಕೆ ಕುಸಿಯುವ ಭೀತಿಯಿದೆ. “11 ಅಭಿಮಾನಿಗಳ ಸಾವಿನ ಕಳಂಕ ಹೊತ್ತಿರುವ ತಂಡವನ್ನು, ಜನರ ಸಂಕಷ್ಟದಲ್ಲಿ ಲಾಭ ಮಾಡಿಕೊಂಡ ವ್ಯಕ್ತಿಯೊಬ್ಬ ಖರೀದಿಸಿದರೆ ಅದು ದುರಂತದ ಪರಮಾವಧಿಯಾಗಲಿದೆ” ಎನ್ನುವುದು ಹಲವರ ಬೇಸರಕ್ಕೆ ಕಾರಣವಾಗಿದೆ.
ಕ್ರೀಡೆಯು ಭಾವನೆಗಳ ವಿಷಯವೇ ಹೊರತು ಕೇವಲ ಬ್ಯಾಲೆನ್ಸ್ ಶೀಟ್ ಅಲ್ಲ. ಆದರೆ ಪೂನಾವಾಲಾ ಅವರ ಟ್ರ್ಯಾಕ್ ರೆಕಾರ್ಡ್ ನೋಡಿದರೆ, ಅವರಿಗೆ ಜನರ ಭಾವನೆಗಳಿಗಿಂತ ‘ರಿಟರ್ನ್ ಆನ್ ಇನ್ವೆಸ್ಟ್‌ಮೆಂಟ್’ ಮುಖ್ಯ ಎಂಬುದು ಸಾಬೀತಾಗಿದೆ. ಲಂಡನ್‌ನಲ್ಲಿ ಕುಳಿತು ರಿಮೋಟ್ ಕಂಟ್ರೋಲ್ ಮೂಲಕ ತಂಡವನ್ನು ಮುನ್ನಡೆಸಲು ಹೊರಟಿರುವ ಅವರಿಗೆ, ಚಿನ್ನಸ್ವಾಮಿ ಕ್ರೀಡಾಂಗಣದ ಗೇಟ್‌ನಲ್ಲಿ ಪ್ರಾಣಬಿಟ್ಟ 11 ಅಭಿಮಾನಿಗಳ ಕುಟುಂಬದ ನೋವು ಅರ್ಥವಾಗಲಿದೆಯೇ? ಎಂಬುದು ಯಕ್ಷಪ್ರಶ್ನೆ.
ಅಂತಿಮವಾಗಿ ಹೇಳುವುದಾದರೆ, ಲಸಿಕೆ ಮಾರಾಟದ ಹಣ, ಲಂಡನ್ ಐಷಾರಾಮಿ ಜೀವನ ಮತ್ತು ಈಗ ಕ್ರಿಕೆಟ್ ತಂಡದ ಖರೀದಿ – ಈ ಮೂರೂ ಬೆಳವಣಿಗೆಗಳನ್ನು ಗಮನಿಸಿದರೆ, ಪೂನಾವಾಲಾ ಪಾಲಿಗೆ ಭಾರತ ಕೇವಲ ಒಂದು ಮಾರುಕಟ್ಟೆ ಮಾತ್ರ. ಈಗಾಗಲೇ 11 ಸಾವುಗಳ ಭಾರದಿಂದ ನೊಂದಿರುವ ಆರ್‌ಸಿಬಿ, ಇಂತಹ ಲಾಭಬಾಕತನದ ಕೈಗೆ ಸಿಕ್ಕರೆ ಮತ್ತಷ್ಟು ಅಧಃಪತನ ಕಾಣುವುದರಲ್ಲಿ ಸಂಶಯವಿಲ್ಲ.
