- ವಿದೇಶಗಳ ಸಂಖ್ಯೆಗಳ ರೀತಿಯಲ್ಲಿ ಬರುವ ಕರೆಗಳು
- ಉದ್ಯೋಗ, ಬಹುಮಾನ ನೀಡುವುದಾಗಿ ಹೇಳಿ ವಂಚನೆ
ವಿಶ್ವದ ಜನಪ್ರಿಯ ಹಾಗೂ ಅತಿ ಹೆಚ್ಚು ಬಳಕೆದಾರರನ್ನ ಹೊಂದಿರುವ ಸಾಮಾಜಿಕ ಮಾಧ್ಯಮ ವಾಟ್ಸ್ಆ್ಯಪ್. ಆದರೆ ತಂತ್ರಜ್ಞಾನ ಮುಂದುವರೆದಂತೆ ಸಾಮಾಜಿಕ ಮಾಧ್ಯಮಗಳ ಮೂಲಕ ಸಾರ್ವಜನಿಕರನ್ನು ವಂಚಿಸುತ್ತಿರುವವರು ದಿನೇ ದಿನೆ ಹೆಚ್ಚಾಗುತ್ತಿದ್ದಾರೆ. ನಿತ್ಯವೂ ಒಂದಲ್ಲ ಒಂದು ದೇಶಗಳಲ್ಲಿ ನೂರಾರು ಪ್ರಕರಣಗಳು ದಾಖಲಾಗುತ್ತಿವೆ.
ನಮ್ಮ ದೇಶದಲ್ಲಿ ಇತ್ತೀಚಿನ ದಿನಗಳಲ್ಲಿ ಕೆಲ ದೇಶಗಳ ಕೋಡ್ಗಳಿಂದ ಬರುವ ಸಂಖ್ಯೆಗಳಿಂದ ವಾಟ್ಸ್ಆ್ಯಪ್ ಕರೆ ಹಾಗೂ ಸಂದೇಶದ ಮೂಲಕ ವಂಚಿಸುತ್ತಿರುವ ದೂರುಗಳು ಹೆಚ್ಚಾಗುತ್ತಿರುವ ಬಗ್ಗೆ ನೂರಾರು ದೂರುಗಳು ದಾಖಲಾಗುತ್ತಿವೆ. ಉದ್ಯೋಗಿಗಳು ಹಾಗೂ ವ್ಯವಹಾರ ಮಾಡುತ್ತಿರುವವರನ್ನೇ ಹೆಚ್ಚಾಗಿ ಗುರಿಯಾಗಿಸಿಕೊಂಡು ಲಕ್ಷಾಂತರ ರೂ. ದೋಚುತ್ತಿದ್ದಾರೆ.
ಈ ಸುದ್ದಿಯ ಬಗ್ಗೆ ಮಾತನಾಡಿದ ಕಲಾ ಮಾಧ್ಯಮ ನಿರೂಪಕರು
ವಾಟ್ಸ್ಆ್ಯಪ್ ಮೂಲಕ ಗ್ರಾಹಕರನ್ನು ಬಲಿಪಶು ಮಾಡುತ್ತಿರುವ ವಂಚಕರು ಇಥಿಯೋಪಿಯಾ (+ 251), ಮಲೇಷ್ಯಾ (+ 60), ಇಂಡೋನೇಷ್ಯಾ (+ 62), ಕೀನ್ಯಾ (+ 254), ವಿಯೆಟ್ನಾಂ (+ 84) ಮತ್ತು ಇತರ ಕೋಡ್ನೊಂದಿಗೆ ಪ್ರಾರಂಭವಾಗುವ ಅಂತರರಾಷ್ಟ್ರೀಯ ನಂಬರ್ಗಳಿಂದ ಕರೆ ಮಾಡುತ್ತಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಹೊಸ ಫೀಚರ್ ‘ಕೀಪ್ ಇನ್ ಚಾಟ್’ ಸೇರಿ ಹಲವು ಆಯ್ಕೆಗಳನ್ನು ಪರಿಚಯಿಸಲಿರುವ ವಾಟ್ಸ್ಆ್ಯಪ್
ಮೇಲಿನ ವಿದೇಶಿ ಸಂಖ್ಯೆಗಳೊಂದಿಗೆ ಆರಂಭವಾಗುವ ಈ ಕರೆಗಳನ್ನು ಸಾರ್ವಜನಿಕರು ಅಂತರರಾಷ್ಟ್ರೀಯ ಕರೆಗಳೆಂದು ಭಾವಿಸಬಾರದು. ವಾಸ್ತವವಾಗಿ ಇಂತಹ ಕರೆಗಳು ಇಂಟರ್ನೆಟ್ ಮೂಲಕ ರವಾನೆಯಾಗುವ ಕರೆಗಳಾಗಿವೆ. ನೀವಿರುವ ನಗರದಲ್ಲಿಯೇ ಕುಳಿತು ಕೆಲ ಕಿಡಿಗೇಡಿಗಳು ವಾಟ್ಸ್ಆ್ಯಪ್ ಕರೆಗಳಿಗಾಗಿ ಅಂತರರಾಷ್ಟ್ರೀಯ ಸಂಖ್ಯೆಗಳನ್ನು ಮಾರಾಟ ಮಾಡುವ ಏಜೆನ್ಸಿಗಳನ್ನು ನಡೆಸುತ್ತಿದ್ದಾರೆ.
ಸೆಲ್ಯುಲಾರ್ ಕರೆಗಳಿಗೆ ಅನ್ವಯವಾಗುವಂತೆ ಯಾವುದೇ ಅಂತರರಾಷ್ಟ್ರೀಯ ಕರೆ ಶುಲ್ಕಗಳ ಬಗ್ಗೆ ಚಿಂತಿಸದೆ ಅಂತಹ ಸಂಖ್ಯೆಯಿಂದ ಕರೆ ಮಾಡಬಹುದು ಎನ್ನಲಾಗಿದೆ. ಇಂತಹ ಕರೆಗಳು ಗ್ರಾಹಕರನ್ನು ವಂಚನೆಯ ಜಾಲದಲ್ಲಿ ಸಿಲುಕಿಸಿ ಅವರ ಖಾತೆಯಲ್ಲಿರುವ ಹಣವನ್ನು ಖಾಲಿ ಮಾಡುವ ಕೆಲಸ ಮಾಡುತ್ತಿವೆ.
ಕರೆ ಮಾಡುವ ವಂಚಕರು, ಪೂರ್ಣಕಾಲಿಕ, ಅರೆಕಾಲಿಕ ಕೆಲಸ ನೀಡುವುದಾಗಿಯೋ, ಸಂದರ್ಶನಕ್ಕೆ ಕರೆಯುವುದಾಗಿಯೋ, ಉಚಿತ ಕೂಪನ್ ಕೊಡುವುದಾಗಿಯೋ, ಬಹುಮಾನ ನೀಡುವುದಾಗಿಯೋ ಅಥವಾ ವ್ಯವಹಾರ ಆರಂಭಿಸುವುದಾಗಿಯೋ ಹೇಳಿ ಮೋಸ ಮಾಡುತ್ತಾರೆ.
ಸಾರ್ವಜನಿಕರು ಇಂತಹ ಕರೆಗಳು ಬಂದರೆ ಬ್ಲಾಕ್ ಮಾಡಬೇಕು, ಇಲ್ಲವೆ ಪೊಲೀಸರಿಗೆ ದೂರು ನೀಡಬೇಕು. ಆದರೆ ಯಾವುದೇ ಕಾರಣಕ್ಕೂ ಹಣ ವರ್ಗಾಯಿಸುವ ಮೋಸದ ಜಾಲಕ್ಕೆ ಮರುಳಾಗಬಾರದು.