ಚುನಾವಣಾ ಆಯೋಗ ವಿಶೇಷ ತೀವ್ರ ಪರಿಷ್ಕರಣೆ (Special Intensive Revision-SIR) ಪ್ರಕ್ರಿಯೆಯನ್ನು ರಾಜ್ಯಾದ್ಯಂತ ಕೈಗೊಂಡಿದೆ. SIR ಹಲವಾರು ಪ್ರಶ್ನೆಗಳನ್ನು ಹುಟ್ಟು ಹಾಕುತ್ತಿದೆ. ಮತದಾರರಲ್ಲಿ ಮಾತ್ರವಲ್ಲ, ಈ ಕೆಲಸ ನಿರ್ವಹಿಸುತ್ತಿರುವ ಬೂತ್ ಮಟ್ಟದ ಅಧಿಕಾರಿಗಳಾದ (BLO) ಮತ್ತು ರಾಜಕೀಯ ಪಕ್ಷಗಳ ಬೂತ್ ಮಟ್ಟದ ಏಜೆಂಟರಲ್ಲಿಯೂ (BLA) ಗೊಂದಲವೇ ಹೆಚ್ಚಾಗಿದೆ. ಜಿಲ್ಲೆಯಲ್ಲಿ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ(ಎಸ್‌ಐಆರ್‌) ಪ್ರಕ್ರಿಯೆ ಶೇ.84.61ರಷ್ಟು ಪೂರ್ಣಗೊಂಡಿದೆ. ಈವರೆಗೆ ಒಟ್ಟು 94,680 ಪತ್ತೆಯಾಗದ ಮತದಾರರ ಹೆಸರನ್ನು ಪಟ್ಟಿಯಿಂದ ಡಿಲೀಟ್‌ ಮಾಡಲಾಗಿದೆ.
ಜಿಲ್ಲೆಯ ಏಳು ವಿಧಾನಸಭೆ ಕ್ಷೇತ್ರದ 15,42,802 ಮತದಾರರಿದ್ದು, ಈ ಪೈಕಿ 43,264 ಮತದಾರರು ಮೃತಪಟ್ಟಿದ್ದಾರೆ. 39,485 ಮತದಾರರು ಶಾಶ್ವತವಾಗಿ ಬೇರೆಡೆ ಸ್ಥಳಾಂತರಗೊಂಡಿದ್ದಾರೆ. ಎರಡೆರಡು ಸ್ಥಳದಲ್ಲಿ ಮತದಾನದ ಹಕ್ಕು ಹೊಂದಿದ್ದ 8,689 ಮತದಾರರನ್ನು ಪಟ್ಟಿಯಿಂದ ಕೈಬಿಡಲಾಗಿದೆ. ವಿಳಾಸದಲ್ಲಿಯೇ ಇಲ್ಲದಿರುವ 2946 ಹಾಗೂ ಇತರೆ 296 ಮತದಾರರ ಹೆಸರನ್ನು ಪರಿಷ್ಕರಣೆ ವೇಳೆ ಡಿಲೀಟ್‌ ಮಾಡಲಾಗಿದೆ. ಅರ್ಹ ಮತದಾರರ ಹೆಸರು ಕೈಬಿಟ್ಟು ಹೋಗಿದ್ದಲ್ಲಿ ಆಕ್ಷೇಪಣೆ ದಾಖಲಿಸಿ ಅರ್ಜಿ ನಮೂನೆ -6ರಲ್ಲಿಸಲ್ಲಿಸಿ ಪಟ್ಟಿಗೆ ಸೇರಿಸಬಹುದಾಗಿದೆ ಎನ್ನುತ್ತಾರೆ ಜಿಲ್ಲಾಧಿಕಾರಿ ಲತಾಕುಮಾರಿ.
ಹಾಸನದಲ್ಲಿ ಎಷ್ಟು ಜನರನ್ನು ಮತದಾರರ ಪಟ್ಟಿಯಿಂದ ತೆಗೆದಿದ್ದಾರೆ? ಹಾಸನ ವಿಧಾನಸಭೆ ಕ್ಷೇತ್ರದಲ್ಲಿಅತಿ ಹೆಚ್ಚು 16,712 ಮತದಾರರ ಹೆಸರನ್ನು ಪಟ್ಟಿಯಿಂದ ಕೈಬಿಡಲಾಗಿದೆ. ಶ್ರವಣಬೆಳಗೊಳದಲ್ಲಿ14,278, ಅರಸೀಕೆರೆ ಕ್ಷೇತ್ರದಲ್ಲಿ 9,496, ಬೇಲೂರು 12,267, ಹೊಳೆನರಸೀಪುರ 14331, ಅರಕಲಗೂಡು 15,569, ಸಕಲೇಶಪುರ ಕ್ಷೇತ್ರದಲ್ಲಿ12027 ಮತದಾರರು ಸೇರಿ 94,680 ಮತದಾರರ ಹೆಸರು ಕೈಬಿಡಲಾಗಿದೆ. ಈ ಸಂಖ್ಯೆ ಇನ್ನು ಅಧಿಕವಾಗುವ ಸಾಧ್ಯತೆ ಇದೆ ಎನ್ನುತ್ತಾರೆ ಅಧಿಕಾರಿಗಳು.
SIR ಪ್ರಕ್ರಿಯೆಯಲ್ಲಿ ಸವಾಲುಗಳು! ಮತದಾರರ ಪಟ್ಟಿಯ ಎನ್ಯುಮರೇಷನ್‌ ಅರ್ಜಿಯನ್ನು ಮನೆ ಬಾಗಿಲಿಗೆ ಸಲ್ಲಿಸಿ ವಾರ ಕಳೆಯುತ್ತಾ ಬಂದರೂ ಕೆಲವರು ಭರ್ತಿ ಮಾಡಿಲ್ಲ. ಹೀಗಾಗಿ ಬಿಎಲ್‌ಒಗಳೇ ಸಮಗ್ರ ಮಾಹಿತಿ ಪಡೆದು ಭರ್ತಿ ಮಾಡುವ ಅನಿವಾರ್ಯತೆ ಎದುರಾಗಿದೆ. ಅಷ್ಟೇ ಅಲ್ಲದೆ ಒಂದಿಷ್ಟು ಜನ ಈ ಪ್ರಕ್ರಿಯೆಯನ್ನು ಗಂಭೀರವಾಗಿ ಪರಿಗಣಿಸಿದಂತೆ ಕಾಣುತ್ತಿಲ್ಲ ಎಂಬ ಸಂಗತಿ ಪ್ರಕ್ರಿಯೆ ವೇಳೆ ಕಂಡುಬಂದಿದೆ ಎನ್ನುತ್ತಿದ್ದಾರೆ ಸಿಬ್ಬಂದಿ.
ಎಷ್ಟೋ ಮತದಾರರು ವಿಳಾಸದಲ್ಲಿ ಇಲ್ಲ: ಮತದಾರರು ವಿಳಾಸದಲ್ಲಿ ಇಲ್ಲದಿರುವವರನ್ನು ಪತ್ತೆ ಮಾಡುವುದು ಬಿಎಲ್‌ಒಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಅಕ್ಕ ಪಕ್ಕದವರನ್ನು ಕೇಳಿದರೆ ಅವರು ಇಲ್ಲಿಂದ ಹೋಗಿ ಹಲವಾರು ವರ್ಷಗಳೇ ಆಗಿದೆ. ಎಲ್ಲಿ ಹೋಗಿದ್ದಾರೋ ಗೊತ್ತಿಲ್ಲ, ಇಲ್ಲವೇ ಬದುಕಿದ್ದಾರೆಯೇ ಎಂಬುದು ನಿಖರವಿಲ್ಲ ಎಂಬ ಉತ್ತರವೂ ಬರುತ್ತಿದೆ. ಹೀಗಾಗಿ ಹಲವು ಬಾರಿ ಮನೆ ಬಾಗಿಲಿಗೆ ಹೋಗಿ ಹಿಂತಿರುಗುವ ಜತೆಗೆ ಅರ್ಹ ಮತದಾರರ ಹೆಸರು ಪಟ್ಟಿಯಿಂದ ಬಿಟ್ಟುಹೋಗಬಾರದು ಎಂಬ ಉದ್ದೇಶದಿಂದ ಎಲ್ಲಿಯಾದರೂ ಇದ್ದಾರೆಯೇ ಎಂದು ಪತ್ತೆಮಾಡುವ ಕೆಲಸವನ್ನು ಮಾಡುತ್ತಿದ್ದೇವೆ ಎನ್ನುತ್ತಿದ್ದಾರೆ ಸಿಬ್ಬಂದಿ.
ಇದನ್ನೂ ಓದಿದ್ದೀರಾ?ಚಿಕ್ಕಮಗಳೂರು | ದೇವಸ್ಥಾನದ ಆಭರಣ, ಹುಂಡಿ ಹಣ ಕಳ್ಳತನ; ಪ್ರಕರಣ ದಾಖಲು
ಪ್ರಮುಖ ಪಕ್ಷ ಬಿಜೆಪಿ, ಜೆಡಿಎಸ್‌ನ ಪಾಲಿಕೆ ಸದಸ್ಯರು, ಸ್ಥಳೀಯ ಸಂಸ್ಥೆ ಹಾಗೂ ಪಕ್ಷದ ಮುಖಂಡರು ತಮ್ಮ ವಾರ್ಡಿನ, ಊರಿನ, ಗ್ರಾಮದ ಮತದಾರರ ಹೆಸರು ಪಟ್ಟಿಯಿಂದ ಕೈಬಿಟ್ಟು ಹೋಗದಂತೆ ಮುನ್ನೆಚ್ಚರಿಕೆ ವಹಿಸುತ್ತಿದ್ದಾರೆ.
